Shillong, Risaw 17 : U Nongialam ka BJP bad Myntri Sorkar Bah AL Hek, ha ka sngi Palei, ula pyntip ba ka BJP kan sa pynbna noh shen ia u kyrtong ka party, u ban iakhun ia ka elekshon shiteng samoi ka Gambegre constituency hadien ka jingialang bad ki Nongialam na Delhi ha ka 21 tarik Risaw.
Haba iakren bad ki nongthoh khubor, u Bah Hek ula ong ba ka party kan mih madan ban iakhun ia ka elekshon shiteng samoi bad pyntip ba kila don 2-3 ngut ki briew kiba la pan ia ka ticket na ka party.
“Hadien ba kila aplai, ka party kan sa shim ia ka rai kaba biang tam ba iano yn ai ticket. Ngin sa iakynduh ia ki nongialam na Delhi ha ka 21 tarik bad ngin sa don ruh ka jingiakren lyngba ka internet bad ki nongialam ha kaban sei ia u kyrtong” ula bynrap.
Haba kylli, u Bah Hek ula ong “Nga kubur ia kaei kaba phi ong ba ka BJP ka pynbna slem bha ia u kyrtong. Ha kane ka kynti, kila khot ia ngi ban iakren, kumta ngin sa iakren bad hadien kata, ngin sa shim rai ia u kyrtong”.
Halor ki jingkynnoh jong ki BJP na Ri-lum Garo pyrshah ia ka NPP, u Bah Hek ula ong “Kane ka dei ka Sorkar MDA. Ngi ruh ngi donlang ha ka Sorkar MDA. Ki briew ki don la ki jong ki jingsngew bad ka shong la phi pdiang ne em ka shong beit ha shimet shimet hynrei ka dei ka jingpynsngew jong ki briew”.
