Shillong, Risaw 16 : Palat 32 ngut ki Nongshongshnong ka shnong Puriang, East Khasi Hills kila phah tuklar ha ka Deputy Commissioner halor ka jingkynnoh ba don ka jingthmu ban pynsangeh noh ia ka jingshna ia ka surok 4-Lane jong ka National Highway kaba iaid lyngba ka Mawryngkneng-Puriang.
Kat kum ka jingong jong ki, ka jingshna ia ka surok 4-lane na kawei pat ka lynti bad ba iaid lait ia ka surok rim, khlem pep kan ktah jur ia ka kamai ka kajih bad ka jakpoh jong ki briew kiba sah ha shilynter ka surok National Highway.
Ha ka shithi bala phah sha ka DC Kong RM Kurbah myn ha ka 3 tarik Risaw, kine ki nongshongshnong kila ong ba buna na ki, kiba im ha Mawryngkneng-Puriang, kila ai da ka mon kylluid ia ki jaka jong ki ha u snem 2007 sha ka Sorkar na ka bynta ban shna ia ka surok 4-Lane jong ka National Highway-44 bad ruh, kila dep ioh ia ka bai jaka kat kum ka jingpyn shongdor jong ka Sorkar.
“Hynrei mynta la ioh jingtip ba ka Sorkar kan pynsangeh noh ia ka jingpyniaid ia ka surok 4-Lane na ka surok rim bad kala pynbeit ia ka lynti ba thymmai ba iaid lait ia ka surok rim. Lada kane ka surok 4-lane ka iaid na kawei pat ka jaka, kan dei shisha ka jingduhnong kaba khraw ia ki paidbah bad kan ktah bha ia ka kamai kajih jong ki nongshongshnong kiba shaniah ha kane ka surok ban ioh kamai jakpoh” kila ong.
Nalor kane, ka shithi kala ong ba ka Sorkar kan shu pynleh nohei kai ia ka pisa u paidbah lada ka rai ban pyniaid shakhmat ia ka surok 4-lane na ka lynti kaba thymmai.
