Shillong, Jylliew: Ka Congress kala takrain tyngeh ia ka United Democratic Party (UDP) halor ka jingbein ia ka Sorkar Meghalaya Democratic Alliance (MDA) ba ialam da ka National Peoples Party (NPP) bad ong ba ka jingpynpaw ba tieng ia ka jingwan ka jingsynshar President (President Rule), ka dei tang ka jingaidaw ban neh ha ka bor synshar.
Kane ka jingkynthoh kala mih na u Myntri Sorkar barim ka Congress bad MDC ba mynta ka Mylliem Constituency Bah Ronnie V Lyngdoh uba la ong “San snem duna phi la iakyrsum lang ha ka jyrsieh hynrei mynta pat phi sdang ban kynnoh ia kiwei (NPP). Saw snem phi la iaroh ia ka Sorkar MDA hynrei tang ba la jan ka elekshon, phi la pyrshang ban pynbit thit tang ia kiwei”.
Halor ka jingkam ki Nongialam ka UDP ba kim kwah satia ban mih noh mynta na ka Sorkar MDA namar ka jingtieng ia ka jingsynshar u President, u Bah Ronnie ula ong “Lada phi sngew ba ka Sorkar MDA ka dei ka bym long bad kaba pynjynjar ia ki paidbah, hato kam la lah ban wan ka jingsynshar u President…Kaei ka jingsynshar President?. Hato ka jingsynshar u President kan long shabar na ka Riti Synshar ka Ri”.
U Bah Ronnie ba kane ka jingkren ki Nongialam ka UDP ka dei tang ka jingkwah thet kti bad saitkhuid ialade bad ka dei ka jingkwah tap eitmiaw ia ka jingiadon bynta lang ha baroh kiei kiei.
“Ka UDP hi ka pyni ialade ba ka rhah bor bad ka tieng ban mih na ka Sorkar ta ka daw ka shu ai daw ia ka President Rule” ula ong haba bynrap “ Ka UDP ka tip ba lada ka mih makna na ka Sorkar, kane ka Sorkar MDA ka dang long kaba skhem”.
Kat kum ka jingong jong u, ka UDP ka don tang 9 ngut ki MLA bad lada ka weng noh ialade na ka Sorkar, ka kynhun jong ka MDA kan dang iai neh haduh 39 ngut.
Une u Nongialam ka Congress ula ong ba ki paidbah ki dei kiba la stad bad kin sa bishar bad ai ka rai ha u snem 2023.
