NECDC Wowen’s Interstate T20 | Pynbna jop lang ka Nagaland bad Sikkim kum ki lahduh

Shillong, Risaw 06: Ka Sikkim bad ka Nagaland kila ioh rah lang iaka nam lahduh jongka 1st Senior Women’s Interstate Friendship T20 Tournament ha Nongkhrah, Ri-Bhoi, ha ka sngi Saitjaiñ namar ka jingbym lah ban pynlong ia ka jingiakhun namar ka jingslap.

Katei ka jingiakob kala sdang haka 30 tarik u Nailur bad la pynlong da ka North East Cricket Development Council (NECDC) bad ka Meghalaya Cricket Association (MCA), ha kaba baroh 6 tylli ki jylla ka thain shatei lam mihngi hapoh jongka NECDC kiba kynthup ia ka Arunachal Pradesh, Manipur, Meghalaya, Mizoram, Nagaland bad Sikkim kila wan ban iashimbynta.

Ka jingthmu jong ka NECDC ban pynlong ia katei ka jingiakob ka long ban pynkhreh ia ki nongialehkai kiban iashimbynta ha ka Senior Women’s BCCI 2024-25 Tournament.

Ka Debasmita Dutta jong ka Meghalaya kala ioh iaka nam Player of the Tournament halor ka jinglah ka jongka ban kamai 46 run bad ban shim 5 wiket.

Ia ka nam Best Batter la ioh da ka Samayita Roy Prodhan jongka Sikkim, kaba la kamai 63 run ha ki 3 tylli ki Inning bad ia ka nam Best Bowler la ioh da ka Monica Devi Ningthoujam jongka Manipur kaba la ioh khur 6 wiket katba ka Kalpana Devi jongka Manipur kala ioh ia ka nam Best Wicketkeeper kaba la lah ban pynhap ia 5 ngut ki nongtied.

U Director ka Sports and Youth Affairs u Dikki D Shira, ula ba ka jingtrei shitom bad ka jingiai shah kala long kaba seisoh bad ula kyntu ba kidei ban bteng ban trei shitom, ban praktis bha bad banbteng ban khur ia ka jingjop.

Nalor kane, ula ai khublei ruh ia ka NECDC kaba la pynlong ia katei ka jingiakob ialehkai Cricket ha ka jylla Meghalaya.

Katba u NECDC Founder Co-Convenor bad u President ka MCA u Nababrata Bhattacharjee ula iaroh ia ka jingtrei shitom jongka Ri-Bhoi District Cricket Association (RBDCA), hapoh ka jingialam u President uba long ruh u Vice-President ka MCA) u Bah Rayonald Kharkamni, ban ioh pynkhreh iaka madan ialehkai ha Nongkhrah tang ha ki khyndiat bnai ban pynialehkai cricke.

Nalor kane, ula ai khublei ruh ia ki nongshong shnong bad ia ki nongialam ka
Nongkhrah kiba la shim iala ka bynta na ka bynta ban kyntiew ia ka jingialehkai cricket ha Meghalaya bad ha ka thain.

Katba u Mamon Majumdar, BCCI Apex Council Member ula pynkynmaw ba dei lyngba u Bhattacharjee uba la lam nakhmat ban pynioh ia ki 6 tylli ki jylla jong ka thain shatei lammihngi kum ki dkhot ba pura jong ka BCCI naduh u snem 2018.

“Ka BCCI, lyngba u Secretary u jongka u Jay Shah, ki dang pyrshang ban kyntiew ia ka rukom ialehkai haka thain shatei lammihngi sha ka kyrdan kab iaryngkat bad kiwei pat ki jylla” ong u Majumdar.

“Ka rukom ialehkai ka jong ngi kala sdang iahap bad ka rukom ia lehkai jong kiwei pat hynrei kidei ban trei shitom ban nang kiew shaphrang shuh shuh sha kawei pat ka kyrdan” bad ka bynrap, “Ka don ka kabu kaba biang ia ki nongialehkai cricket kynthei jong ka NECDC bad ula pynshlur ba kidei ban don ia ka thong ban ialehkai ha ka Women’s Premier League kaba ia ryngkat bad ka Indian Premier League.

Kiwei pat kiba la donloang ha katei ka jingialang ki kynthup ia u Additional Superintendent of Police ka Ri-Bhoi u Bah Banraplang Jyrwa, Sub-Divisional Officer ka PWD Nongpoh Dahunlang Shylla, u President ka Sikkim Cricket Association u Tikka Subba, President ka Cricket Association of Mizoram (CAM) u Lalrochuanga Pachuau, u Vice-President ka Arunachal Cricket Association u Kabak Geda, u Honorary Secretary ka Nagaland Cricket Association u Hyunilo Khing, CAM Honorary Secretary u P Lalremruata, CAM Honorary Joint Secretary Lalfakawma Varte bad u Honorary Joint Secretary ka Manipur Cricket Association u Syed Sultan.