Tura, Risaw 05 : Haduh 10 ngut ki briew kila iap na ka jingther u slap uba la lynshop ia ka thain Ri-lum Garo, kaba lam pat sha ki jingjia khyndew bad ki jingshlei um ba shyrkhei. Ka jinglynshor ka bor ka mariang kala itriem bha haduh ba bun ki jingkieng dieng, kila shah rong noh ha ka Wah bad kumjuh ruh ki Iing bad ki surok.
Ha ka sngi Thohdieng, lai ngut ki briew kila duh noh iala ka jingim ha ka thain Dalu kaba hap ha West Garo Hills. Kine ki kynthup ia uwei u Khynnah 5 snem, kawei ka longkmie ba 57 snem ba kyrteng ka Santa N Marak na Koinabui bad ka samla 18 snem Sarika M Narak.
Kawei ka jingjia kaba shyrkhei kala jia hynne ka step ha kaba haduh hynniew ngut ki briew na kajuh ka longiing, la pynthikna ba kila iap ha ka shnong Atisia Songma kaba hap hapoh ka Gasuapara Police Station, South Garo Hills. Kine kila shah btep im ha ka khyndew ba twa bad leit ban ia ka Iing ba ki sah.
Napdeng kine ki 7 ngut, arngut ki dei ki Khynnah kiba dang hapoh 8 snem. Iwei i dei i Khunksiew ba 8 snem Silbera Marak, iwei i Khun miaw ba shisnem shiteng Dimde R Marak, ka Silji R marak (kmie) ba 60 sne, Merina R marak (khun) ba 39 snem, u Sama N. Sangma (pyrsa kurim) ba 50 snem, ka Chengbe R marak (khunksiew) ba 22 snem, u heprit Desrang R marak (khunksiew) ba 14 snem.
Namar kane ka jingshlei um bad jingtwa khyndew hapoh ka thain, u Myntri Rangbah ka Jylla Conrad K Sangma, ula bthah ia ki bor District ba kin pan ia ka jingiarap na ka Sorkar Pdeng ban pynthikna ba ki lad jingiarap kin long kiba iaid beit iaid ryntih sha ki jaka kiba shah ktah.
Ula lum ruh ia ka jingialang bishar kam halor ka jingshlei um ha Ri-lum Garo ha ka step sngi Saitjain, kaba la ktah ia baroh 5 tylli ki District khamtam ka South Garo Hills bad West Garo Hills.
Ka jingther u slap ba khlem sangeh naduh ka miet sngi thohdieng, kala wanrah ia ka jingshlei um kaba shyrkhei ha ki thain Dalu, West Garo Hills bad ki jaka them jong ka thain, ka Gasuapara ha South Garo Hills ruh kala shah ktah jur bha ha kaba kawei ka jingkieng kala shah rong noh ha ka um.
U Myntri Rangbah ula bthah ia ki bor District ba kin pyllait noh ia ka song jingiarap pisa sha ki bahaiing jong kine ki briew kiba iap.
Kiba bun ki surok ha ka thain kila dkut lut na ka jingrong ka um bad ka jingtwa ki khyndew. U Myntri Rangbah ula bthah ia ki bor District ban ithuh ia kiwei pat ki lynti iaid khamtam ia ka surok kaba pyniasoh ia ka Dalu sha Baghmara.
Ula bthah ruh ban tei thymmai noh ia ki jingkieng dieng kiba la shah rong ha ka um. Ula ai jingmut ban shna shuwa da ki Bailey Bridge ha kine ki jingkieng ba shah rong.
U Myntri Rangbah ula pyntip ruh ha ka jingialang ba ka Sorkar kala dep ithuh ia ki jingkieng dieng hapoh ka Jylla bad kan sa bujli noh da ki jingkieng maw.
U Myntri Rangbah ula bthah ruh ia ki bor District ba kin peit pyrman bha ia ka jinglong jingman ka mariang hala ki jong ki jong ki District.
Haduh mynta, ki don haduh 4954 ngut ki briew na ki 330 tylli ki longiing kiba la shah ktah jur ha kane ka jingther u slap bad 58 tylli ki Iing kila julor. La pyntip ba haduh 54 tylli ki Shnong kila shah ktah bad 10 tylli ki jingri jingdup kila iap.
Haba phai sha ka jingjulor ki jingtei, la pyntip ba baduh 18 tylli ki surok kila julor, kawei ka PHC, kawei ka Sub Centre, kawei ka skul, kawei ka thliew muri bad ka pung, kiba don ha West Garo Hills, South Garo Holls bad South West Garo Hills.
Ha kajuh ka por, ka khubor ka pyntip ba u Myntri Rangbah ka Jylla u lah ban leit hiar jurip ia ki jaka ba twa khyndew bad ba shah ktah ha ka jingshlei um ha ka sngi Ba-ar.
