Ioh ka Meghalaya sa 40 ki seat pule MBBS da ka jingithuh ka Sorkar Pdeng ia ka PA Sangma Medical College

Shillong, Risaw 03 : Ka Myntri ka Koit ka Khiah Kong Ampareen Lyngdoh ha ka sngi Palei kala pyntip ba ka Meghalaya kala ioh biang sa 40 tylli ki seat ban pule MBBS da ka rai jong ka Sorkar ban ai jingbit ia ka PA Sangma Internatonal Medical College ka University of Science and Technology, Meghalaya (USTM) kum ka medical college shimet ba nyngkong eh ha Jylla.

Haba iakren bad ki nongthoh khubor, ka kong Ampareen kala ong “U Myntri Rangbah ka Jylla Conrad K Sangma ula ai khublei ia ki (USTM) halor kane ka jingjop, ban sdang ia ka medical college ba nyngkong eh ha Jylla hapoh ka Institute jong ka. Ngi ruh ngi kmen bha ban ioh jingtip ba mynta ka sngi sa 40 tylli ki seat pule MBBS kin dei ki open seat ia ki samla pule ka Meghalaya, kiba kwah ban leit pule MBBS”.

“Na kine ki 40 seat, 20 tylli kin dei hapoh ka scholarship ba pura katba 20 tylli ki sear kin dei ha ka jingsiew ba mar shiteng. Ngi ai khublei ia ka USTM bad ngi kyrmen ba ki samla pule ka Meghalaya kin ioh jingmyntoi bha na kane ka kabu kaba khraw” kala bynrap.

Haba pyntip ba snem pule 2024-25 kala sdang, ka Myntri kala ong “Ngin sa don la ka jong ka jingpynbna ia kane namar dang shu pyntip ia ngi shaphang kane ka seat. Ngin sa pyntip sha ki nongshongshnong lyngba ki lynti kiba dei bad ki jingpynbna ha kine ki khyndiat sngi ban wan”.

Kat kum ka jingong jong ka, ka medical seat baroh lang na ka bynta ka Meghalaya kala kiew sha ka 133 tylli ha kaba 93 tylli la ai na ka Sorkar Pdeng.

Kane ka College (USTM) kala ioh jingbit ban pdiang haduh 150 ngut ki samla pule ha ka shisnem. Mynta ka dang ap ia ka jingbit na ka National Medical Commission (NMC).

Halor ka jingkyrpad ka USTM ban ai rem ba T.200 klur ban lah pyntrei ia baroh ki jingtei bad ban buh ia ka hospital ba 400 jingthiah, ka Myntri kala ong “Ngi la tyrwa ia kane. Ngim pat lah ban pynbeit ia ka lynti kumno ban leh hynrei ka kam kala iaid shakhmat”.

La ka Sorkar kan iasoi ia ka MoU bad ka USTM ban pyniaid ha ka PPP mode ia ka Medical College, ka kong Ampareen kala ong “Hooid, ngi dang ap ia u Myntri Rangbah ban ai ia ki jingbthah halor kane ka kam.”