Tura, Risaw 03 : U Myntri Rangbah ka Jylla Conrad K Sangma, ula pyllait paidbah ia ka GREEN Meghalaya plus scheme, kaba thmu ban nang pynbun ia ki jaka khlaw ha Meghalaya bad ban pynneh pynsah ia ki khlaw jong ka Ri-lum Garo. Ia kane ka skhim lapyllait ha ka jingialang ba long ha Tura ha ka sngi Balang.
Ka GREEN Meghalaya Plus ka dei shibynta jong ka prokram ka Sorkar-Payment for Eco System Services (PES), ha kaba la ai jingiarap song pisa haduh T.20,000 shi hectare manla u snem sha ki Shnong ki thaw bad ki riew shimet kiba iada bad pynneh pynsah ia ki khlaw. Ka Green Meghalaya Plus ka don jinthmu ban kynthup ia ka jingpyniar ia ki jaka khlaw sha ka 50,000 hectare ban ai jingiada.
Ha ki snem bala leit noh, palat 3000 ngut ki riew shimet bad ki shnong, kila ioh jingmyntoi na kane ka skhim bad palat 54,000 hectare ki jaka khlaw la lah ban ai jingada bad pynneh pynsah.
Haba kren ha ka jingialang, u Myntri Rangbah ula pynpaw ia ka jingsngewnguh ia ki nongioh bynta na kylleng ka Ri-lum Garo kiba la wan iashimbynta ha kae ka prokram ban iada ia ki khlaw ki btap.
“Ha ki hynniew snem bala leit noh, ka Sorkar kala buh ia u mawnongrim bad kala sdang ia ki prokram ki ban ai jingmyntoi ia ki briew jong ngi, kaba lam sha ka jingkiew sted bad ka roi ka par jong ka Jylla. Kum ka Sorkar, ngi la shim kabu ia ki song pisa bapher bapher na ka Jylla, ka Sorkar Pdeng bad ki Agency na shabar ka Jylla na ka bynta ka jingkiew shaphrang jong ka Jylla” ula ong.
Haba kdew ba ka roi ka par jong ki kam bapher bapher ka long kaba kongsan ka ban nang pyntyllun shakhmat ia ka jingkiew ka ioh ka kot, u Conrad ula ong “Ngi hap ban don ia ka jingkitkhlieh na ka bynta ka mariang bad ban iatrei ha ka rukom ka ban pynbiang tarajur ia ka mariang bad ka roi ka par”.
U pyntip ha ki arsnem bala leit noh, ka Sorkar Jylla kala pynlut ia palat T.44 klur ban pynneh pynsah bad iada ia ki khlaw bad kala mang ruh sa palat T.200 klur ban pyndonkam ha kine ki snem ban sa wan.
Ula kyntu ia ki Shnong ki thaw ba kin iashimbynta shithem da ka jingkitkhlieh ban iada bad pynneh pynsah ia ki khlaw.
Ha kane ka prokram, u Myntri Rangbah ula sam ruh ia ki cheque sha ki nongioh bynta jong ka CM ELEVATE, FOCUS bad ka Parment for Eco System Services.
