Shillong, Risaw 03 : Ka PA Sangma International Medical College jong ka University of Science & Technology, Meghalaya *USTM), kala kylla long ka Medical College ba nyngkong eh ha Meghalaya hadien ka jingioh jingithuh bad jingmynjur na ka Ministry of Health & Family Welfare ba kan sdang noh ia ki course.
Kat kum ki khubor ba ioh lum, ka College kala ioh ia ka jingbit ban pynrung klas ia 150 ngut ki samla pule ha ka shisnem. Mynta ka dang ap sa ia ka jingbit na ka National Medical Commission (NMC).
Haba pyntip ia kane ha ka social media, u Myntri Rangbah ka Jylla Conrad K Sangma ula ong “ U Chancellor ka USTM, Mahbubul Hoque lem bad u Prof GD Sharma bad u Padmashri Dr S Saharia, kila pyntip ia u Myntri Rangbah ba don burom Conrad K Sangma ban pyntip iaka jingioh jingbit na ka Ministry of Health and Family Welfare, ka Sorkar India ba kan sdang pyntreikam noh ia ka PA Sangma International Medical College and Hospital na ka bynta u snem pule 2024 na ka bynta 150 ki seat MBBS”.
U Conrad K Sangma ula buh ia u mawnongrim jong ka Medical College ha u Risaw 2022. Ula ong ha katei ka por ba kane ka Medical College kan dei ka jingainam kaba khraw duh ia u Kpa uba ngeit ba ka jingkynshew ha ki paidbah ka dei ka jingkynshew kaba khraw duh. Ula ong ba kane ka Medical College kan long ka jingkyrkhu kaba khraw ia ki paidbah ka thain. Ula ai khublei ia u nongseng ka USTM Mahbubul Hoque uba la pynkup ia kane ka burom ia u Kpa jong u.
Shuwa kane, u Hoque ula pan ia ka jingkyrshan na ka Sorkar Jylla halor ka jingbei tyngka ia ka Medical College. Ula ong, naba ka jingpule MBBS ka dei kaba lutksan bha, ula pan ia ka jingbei tyngka na ka Sorkar Jylla khnang ba kane ka Medical College kan ioh ban buh bhah kyrpang ia ki samla pule ka Jylla Meghalaya.
Nalor kane, ka USTM kala don ruh ia ka hospital kaba treikam bad kan sa kyntiew kyrdan sha ka Super-Speciality Hospital ha ki snem ban wan, ka ban don ia palat 1000 tylli ki jingthiah.
Ka Hospital ia mynta ka don ia ka X-Ray bad kiwei ki tiar suar kum ka Endoscopy, FibroScan, CT scan badkiwei kiwei.
Ha kajuh ka por, ka Sorkar Meghalaya kala pyrshang ban seng iala ka jong ka Medical College da ki phew snem. Ia mynta, ka jingtrei kala iaid shaid shaid ban seng ia ka Shillong Medical College ka ban sa sdang treikam hapoh u 2025-26.
Ki heh ka NMC kila wan iuhkjat ha Jylla bad pyni lynti ia ka Sorkar Jylla ha ki snem bala leit noh. Ka Sorkar Jylla kala pynlong ruh ia ki prokram ai jinghikai ia ki doktor Specialist ba kin shim ia ka bynta ban long ki nonghikai ha ka Shillong Medical College ban sa wan jong ka Jylla.
Nalor kane, ka Sorkar kala pyntrei shaid shaid ruh ia ka Medical College ha Tura, Garo Hills, kaba la buh ban sdang treikam hapoh u 2027.
