Shillong Risaw 02: Ki nonghikai skul hapoh ka lama Meghalaya Sarva Shiksha Abhiyan Schools’ Association (MSSASA) hynne ka sngi Balang, da kawei ka jingmut kila shim ia ka rai ban ai por 2 bnai ia ka sorkar jylla ba kan pynmih iaka polisi treikam ban thungkam pura noh ia palat 12,541 ki nonghikai SSA.
Kane kala mih tang hadien shi sngi ba ka kynhun jong ka SSA kaba dei ka All Meghalaya SSA School Teachers Association (AMSSASTA) kala sdang ia ka jingiakhih kaba khlem buh por da kaba shong kyllain mungor ban dawa pynkiew iaka tulop da 100%.
Hadien bala dep pyniaid iaka jingialang, u President ka MSSASA u Bah Aristotle C Rymbai ula ong, “Hadien ba ngi lah iakren bad iatai sani bha, ngi lah ia shim lang ia ka rai ban jied ne shim tang ia ki 2 tylli ki mat kata ban kyntiew iaka tulop bad iaka jingshngain jong ka jingshakri. Ngi lah rai ban pynbor ia ka sorkar ban thaw ia ka polisi na ka bynta ban ai jingshngain ia ka jingshakri ki nonghikai SSA ha ka jylla Meghalaya kumba la leh ha kiwei pat ki jylla kiba don hapoh ka ri”.
“Ngi lah shim ruh ia ka rai ban ai por 2 bnai ia ka sorkar jylla (ban pynmih ia ka polisi). Hapoh 2 bnai jong ka jingai por, ka tnad pule puthi kadei ban pyndep ia baroh ki jingdonkam bad ban phah ia ki kot ki sla sha ka kynhun myntri khnang ba ka sorkar jylla kan ioh leh ia kaba donkam” ula ong.
U Bah Rymbai ula byrngem ba ka Association kam banse ban shim syndon da ki sienjam ban pynlong da ka jingiakhih kaba tyngeh lada ka sorkar kam shimkhia ia ka jingdawa jongka.
Ula ong ba ia katei ka mat la iakren ha ka jingialang kaba la long hynne ka sngi katkum ka rai kaba la shim da ka jingialang jongka General Executive Council (GEC) kaba la long ha ka 21 tarik u Nailur, hadien ba kila ioh ia ki jingtip na ka tnad pule puthi halor ka jingthmu jongka sorkar jylla ban ai ka jingshngain ia ka jingshakri ki nonghikai SSA ha ka jylla.
“Ngi lah rai ruh ban phah ia ka rai kaba la shim da ka GEC sha ka sorkar jylla” ong u President ka MSSASA bad ka bynrap “Ha katei ka jingai por 2 bnai, ngin leit ruh ban iakynduh ia u Myntri Rangbah ka jylla u Conrad K Sangma bad ki Myntri Sorkar ban kyrpad iaki ba kin thaw iaka polisi treikam ha kaba iadei bad ka jingshngain jong ka kam shakri ki nonghikai SSA ha ka jylla Meghalaya.”
Hynin ka sngi haba kynthoh ia ka rai kaba la shim da ka MSSASA na ka bynta ban thungkam pura ia ki nonghikai SSA, u General Secretary ka AMSSASTA u Bah Wanpyndaphi Lapang ula ong ba ki heh ophisar ka pule puthi kila kyntait ba ka don kano kano ka jingthmu jong ka sorkar ban thungkam pura noh ia ki nonghikai SSA.
“Hadien ba ngi la iohi ia ki khubor ha ki lad pathai khubor, ngi lah leit iakynduh ia u State Project Director ka SSA bad Commissioner & Secretary ka pule puthi ban dawa ia ka notification halor ka jingthmu ban thungkam pura ia ki nonghikai SSA. Ha katei ka jingialang ki heh ophisar sorkar kila kyntait ia katei ka jingmih khubor bad kila iathuh ia ngi ba ka sorkar ia mynta kan ym pat lah ban thungkam pura ia ki nonghikai SSA. Kumta halor katei, ngi lah ia rai ban ieng skhem ha ka jingdawa ba dei ban kyntiew iaka tulop ka jong ngi da 100%” ula ong.
U Bah Lapang ula pynshai ruh da kaba ong, “Ngim shym la ong ba ka sorkar kadei ban thungkam pura noh hynrei ngi dawa ba ka sorkar kadei ban pynbeit ryntih ne ban pyniaosh ia ki nonghikai SSA bad ka tnad pule puthi. Lada phi ong ban thungkam pura, kin don bun ki kyndon ia kaba hap ban pyndep bad kan ym long kaba bha namar ba kiba bun hi ki nonghikai mynta kidei kiba la heh ha ka rta ka jongki. Kumta ngi la pynbor ba ka sorkar kadei ban pyniasoh lang noh bad ka tnad pule puthi da kaba iaid da ka wat kumba la leh ha kiwei pat ki jylla”.
U Bah Lapang ula banjur ruh, ia ka jingdonkam ia ka sorkar ban shim da ka lynti jong ka ‘Deficit Pattern’ haba pynkynriah ia ki nonghikai SSA sha ka tnad pule puthi, ia kaba ka sorkar kan siew ia ka tulop jong ki nonghikai bad ki skul kin sah beit ha ki School Managing Committee.
Ka sorkar kala kyntiew khatduh ia ka tulop jong ki nonghikai SSA ka long ha ki 8 snem mynshwa kata ha u snem 2016.
 hynne ka sngi Balang, da kawei ka jingmut kila shim ia ka rai ban ai por 2 bnai ia ka sorkar jylla ba kan pynmih iaka polisi treikam ban thungkam pura noh ia palat 12,541 ki nonghikai SSA.){kind=link}