Shillong, Nailur 28: Namar ka jingkhang lad ka Sorkar Jylla ia u Pujyapad Shankaracharya ban wan hiar ka Liengsuin ha ka Shillong Airport, kumta une u nongialam jongka Gaudhwaj Sthapana Bharat Yatra ula pynher noh ia ka lama Gopratishtha hapoh jong katei ka liengsuin katba ka dang her halor suiñ jong ka jylla Meghalaya.
Katkum ka kyrwoh khubor, kane ka kynhun kala pynpaw ba haba kila poi ha ka kad liengsuin ha Agartala, kila ioh jingtip ba ka sorkar Meghalaya kala hukum ia ka bor pyniaid jong ka Airport ba kim dei ban shah ia ka liengsuin ban wan hiar ha katei ka kad liengsuin.
Kila pyntip ba u Director jong ka Shillong Airport ula ai ia ka jingbthah kaba shai kdar ia u Director jongka Agartala Airport, da kaba pynpaw namar ka jingshngain ha kano kano ka dur ruh, yn ym shah ia ka liengsuin ba kyrpang jongu Shankaracharya ban wan hiar ha Shillong Airport jong ka jylla Meghalaya.
“U Pujyapad Shankaracharya ula shim ia ka rai ban pynher ia ka lama hapoh jong ka liengsuin kaba u shong katba ka dang her halor suiñ jongka jylla Meghalaya ban iada ia ki masi bad ula ai khublei ia ka sorkar Meghalaya bad ia ki paidbah kiba pyrshah bad dei lyngba ka jingpyrshah ka jongki ba ula ioh ia ka lad ban pynher ia ka lama halor suiñ kaba 21000 meter. Ngin sa shna ia ka prokram ban wan sha ki paidbah ka Meghalaya, ngin sa wan beit, ban iakren bad ki briew ki jong ngi bad ban iatai ia ka khubor halor jong ka Gaupratishtha bad man la ki briew kiba don ia ka jingsngew ha Meghalaya.
Lah ban ong, ba kane ka jingpynher katei ka kynhun iaka lama hapoh jong ka liengsuin, kadei namar ba ka sorkar jylla kala ai da ka jingthoh ia ki bor pyniaid jong ka Airport ban mana tyngeh ia katei ka kynhun ban wan hiar hapoh Shillong Airport.
Nalor kane, ki nongialam jong ki sengbhalang kiba kynthup iaka KSU, FKJGP, HYC bad kiwei kiwei kila ialum ha katei ka kad liengsuiñ ban pyrshah jur ia ka jingwan u Shankaracharya ban ialap ba dei ban khang noh ban bam ia ka doh masi bad ban pynbna iaka jingthmu ban pynlong ia ka Rally haka 2 tarik u Risaw ha nongbah Shillong ban dawa ba dei ban khang bam doh masi bad ban pynbna ba ka masi kadei ka kmie jongka ri.
Namar katei ka jingpynba ban wan u Shankaracharya, ki bor pyniaid district bad ki heh pulit kila poi sha katei ka kad liengsuiñ ban peit ba kan ym mih kano kano ka jinghuri hura bad ba u Shankaracharya yn ym iohlad ban wan hiar da ka liensguin ha katei ka jaka ioh ka mih ka jinghuri hura kaban ktah syndon ia ka shongsuk shongsain hapoh ka jylla.
