Ym Sngewhun ka JSU ia ka rukom pynbna ia ka result Staff Nurse & ANM

Shillong Nailur 29: Ka Jaiñtia Students’ Union (JSU) ka pynpaw ïa ka jingsngewkhia kaba khraw halor ka jingpynbna ïa ki ‘Result’ jong ka eksamin Staff Nurse bad ANM ha ka 27 tarik u Nailur, 2024, ha ka www.meghealth.gov.in.

“Ngi ngeit ba ka rukom treikam kaba mynta, da kaba pynbna tang ia ki Roll Number jong ki kyrtong kiba biang, khlem da pyni pat ia ka jingioh marks ka jongki shimet ka ktah ia ka jinglong khuid jingsuba bad ka jingshai kdar” la pynpaw ka JSU ha ka kyrwoh khubor.

Ka seng kala pynpaw ba ka jingbym pyni ia ka jingioh Marks kala pynduh lad ia ki ki nongaplai kam ban ioh ia ka jingshai bad iaka hok kaba kidei ban ioh hadien ba kila dep ban pynkhreh bad minot bha.

“Ngi lah dep ban ithuh ia ki jingduna ha ka jingpynbna ia ka result, kynthup ia ka jingjia ba u juh u Roll Number ula mih bunsien, Kumtei ki jingbakla ki pynduh mynsiem bad jingshaniah iaka rukom pynlong ia ka eksamin” la ong ka JSU.

Halor kitei ki jingeh, ka JSU kala kyntu ïa ka Myntri ka Koit ka Khiah ban shim ïa ki sienjam ban pynbeit noh mardor. Ngi kyrpad ba dei ban pynmih biang ia ka result kaban kynthup lang ia baroh ar ki Roll Number bad ia ki Marks ba la ioh da ki kyrtong baroh. Kane ka sienjam kan wanrah ia ka jinglong khuid jingsuba hynrei kan ai iaka jingshaniah kaba skhem ha ka rukom pynlong iaka eksamin.

“Ngi sngewnguh ia ka jingshimkhia jong ka Myntri bad ka JSU, ha kaba kala pynpaw ia ka jingbym tip eiei ia ka jingpynmih bad kala pdiang ruh ia ki jingdawa ki jong ngi. Kala bthah ia ki ophisar ban pynthikna ba ia ki marks kiba la ioh da ki kyrtong kiba la pass ryngkat bad ki jubab dei ban pynmih paidbah” la pynpaw ka JSU bad ka bynrap, “Ngi ap ban leh kloi noh ia katei ka kam bad ka jingpyntip kaba shai kdar halor kane ka kam ban pynthikna ia ka jinglong hok bad bad ka jingkhuid jingsuba na ka bynta baroh ki nongaplai”.