Nongstoin, Nailur 24 : Ka Nongstoin College ha ka sngi Ba-ar, kala rakhe ia ka Graduation Day bad pynkup burom ia ki 440 ngut ki samla pule kiba la pyndep ia ki jingpule.
Kine ki samla ki kynthup ia 383 ngut jong ka Arts Stream, 41 ngut jong ka Science bad 16 ngut jong ka Commerce Stream.
Ia kane ka sngi la pynshongkun da ka jingiadon ryngkat u Chief Secretary ka Jylla bah DP Wahlang kum u Kongsan ha ka jingiadon ryngkat u MLA barim Bah Macmillan Byrsat uba dei ruh u Chairman ka Governing Body ka College bad kiwei kiwei.
Ha kane ka jingrakhe, la pynkup burom kyrpang ruh ïa ki lai ngut ki samla pule kiba dei ki merit holders na ka college, kata u samla Shembhalang Kharsyntiew uba la ïoh ia ka kyrdan ba 7 ha ka Zoology (7th Position), i samla Habaphilari Kharbani, iba la ïoh ia ka kyrdan ba 8 ha ka Geography (8th position) bad i samla Larihun L. Rngaid iba la ïoh ia ka kyrdan ba 9 (9th Position) ha ka Biochemistry.
La ai jingithuh ruh ïa ki nonghikai jong kine ki lai tylli ki subject kiba la iarap ban kyntiew ïa ki samla pule ba kin ïoh ïa kine ki jingjop. La ai burom ruh da ki memento bad certificate ia baroh ki samla pule ba la pyndep ia ka graduate jong ka batch 2024 ha ka Arts, Science, bad Commerce streams.
Haba ai jingkren, u Chief Secretary u la pynpaw ïa ka jingkordor jong kane ka sngi na ka bynta ka college bad khamtam ïa ki samla pule ba la pyndep ia ka graduate. U la ïaroh ruh ïa ki nonghikai kiba la trei shitom ban ai jinghikai ba paka ïa ki samla pule ban kyntiew ïa ka jingnang jingstad jong ki.
“Phi don ïa ka jingkyrmen ban long ka jingshai na ka bynta ban kyntiew shajrong ia ka jylla ha ki liang baroh kata lada phi jied ban trei ïa ki kam ha ka Sorkar, ka kamai kajih, ka pule puthi, ka kam shakri paidbah ne ha kano kano ka bynta. Haba phi sdang ïa kane ka sienjam ba thymmai, kynmaw ba ia ka jingjop jong phi, yn thew ïa ka, ym tang da ka burom ba phi ïoh, hynrei da ka jingleh babha kaba phi iarap lem na ka bynta kiwei,” ong u Bah D. P Wahlang.
