Nongpoh, Nailur 24 : Ka Synjuk ki Rangbah Shnong (SKRS) ka Ri-Bhoi District, hynne ka sngi Ba-ar, kila leit ban ujor hakhmat u Deputy Commissioner ka District, ba un tuklar bad pynbeit ia ka jingkynnoh khein sting palat jong ka Civil Hospital, Nongpoh ha ka jingai jingshakri ia u paidbah.
Ka SKRS bala ialam da u President Bah BB Makdoh bad Secretary PB Sylliang, kila iakynduh markhmat ia u Deputy Commissioner Abhilash Bawanwal halor kane ka kam.
Haba kren sha ki lad pathai khubor, u Bah PB Sylliang ula pyntip ba ka jingiakynduh ia u DC ka dei halor ka jingjia ba dang jia ha kine ki khyndiat sngi ha kaba kawei ka Longkmie kala duh ei ia i Khunlung ba ka pun, namar ka jinghap noh hapoh ka jaka leit bar.
Ula ong ba kane ka jingjia kam dei satia kaba jia nyngkong hynrei kila don ruh kiwei kiwei ki jingjia kiba la jia ha kane ka hospital, kaba la buh ha ka jingsyier ia ki paidbah ban wan phah sumar.
Ula ong ba kawei na kine ki jingjia ka dei kaba jia ia kawei ka samla kaba phlei snam ha jingthiah pang ha kaba ym shym la don ba patiaw ban wan khmih bad leh eiei wat hadien ka jingleit khot ba bynsien.
Ka Synjuk kala kyrpad ia u DC ban shimkhia ha kaban pynbeit ia ka rukom treikam jong kane ka jaka sumar ka Sorkar khnang ba kum kine ki jingjia kin ym jia shuh hadien habud.
Ha kajuh ka por, u bah Sylliang u pyntip ruh ba ka Synjuk kala ioh ruh ban iakren bad u DC halor ka jingslem ban pynmih ia ka result eksamin thungkam ka District Selection Committee (DSC) kaba la dep ban pynlong mynta la bun snem.
