Shillong, Nailur 23 : Ka Meghalaya State Planning Board (MSPB) kala rai ba shen kan sap hah ia ki jingai jingmut kiba bniah sha ka Sorkar Jylla ba kan leh eiei halor ka jingnang jur ka jingdheng kali ha sor Shillong.
Haba kren sha ki lad pathai khubor hadien ka jingpyniaid ia ka jingialang ba nyngkong halor kane ka kam, u Chairman ka MSPB Bah Metbah Lyngdoh ula ong “Hadien ka jingialang bad baroh ki Tnad treikam ba don bynta ha ka kam, ngin sa pynkhreh bad aiti ia ki jingai jingmut kiba bniah sha ka Sorkar Jylla ba kan leh eiei halor ki jingeh jong ka dheng kali ha sor Shillong”.
Ula pyntip ba ha ka jingialang ba hynne ka sngi, haduh saw tylli ki Tnad kila ai ia ki jingbatai kiba bniah kata na ka Tnad Urban Affairs, ka Tnad PWD, Transport bad ka Home Police-kiba la kdew ia ki jingeh bapher bapher ba kila iakynduh nalor ki jingai jingmut.
Kat kum ka jingong jong u, ka Board kan iai bteng ban iakynduh biang ia ki tnad bapher bapher ha ki sngi ban wan bad ka sien ba-ar jong ka jingialang ka lah ban long hapoh ka shitaiew eiei.
“Ka kamram jong ka Board ka long eh tang ban ai jingmut ia ka Sorkar halor ki sienjam ba ka Sorkar ka dei ban shim. Ngi la sdang da ki saw tylli ki Tnad. Ngim pat shim rai satia ha ka jingialang ba mynta hynrei ngi dang hap shong bad ngin sa nang sngap na kiwei pat ki tnad bad ngin sa phah ia ki jingap jingmut” ong u Bah Metbah.
Ha kawei ka liang, u Chairman ka MSPC ula ong ba ka Board kala ai jingmut ban leh eiei noh mardor ha kaban pynduna ia ka jingdheng kali da kaba thung kham bun ki Pulit Traffic.
“(Ha ka jingialang) ka Tnad Pulit kala kdew ia ka jingeh na ka jingduna briew. Ki don tang 150 ngut ki pulit langrut na ka bynta ki 7 tylli ki Police Station. Kane ka dei ka kam ba hap ban leh eiei mardor. Ngi sap hah ia ka jingai jingmut sha ka Sorkar ba kan buh hakhmat ka Tnad kam pohiing ba kan thung kham bun ki constable ki ban don ha surok” ula ong haba bynrap “Ia mynta ngi don tang 100 bad kumba 400 ngut ki homeguard. Ngim lah ban khmih lynti eh ia ki homeguard. Ka Tnad kam pohiing kala kula ban sa leh eiei noh mardor ha ka ban tehkyndon ia kito kiba pynkhein ia ki Traffic Rules”.
Haba kylli, u Bah Metbah ula ong ba ka Shillong ka dei ka sor ba khlem plan, ym don jingartatien ia kane bad dei na kata ka daw nga la ai jingmut sha u Myntri Rangbah ha u 2018 ba ka Sorkar ka dei ban mih noh na Shillong bad ban plan ia ka sorb a thymmai bad ka Sorkar kala leh ia kane bad kila sdang ban iaid ha kane ka lynti.
Ha kawei pat ka jingkylli, u Bah Metbah ula ong “Hooid phi iakren halor ka jingkhapngiah ki surok ha ka por long skul la ka dei mynstep ne janmiet. Ha kine ki por phin iohi ia bun tylli ki kali ha surok. Kumta ka Tnad Urban Affairs kala sdang ia ka STEM scheme ha kaba ngi la iohi ia ka jingduna ki kali kiba iaid ha kane ka por. Namar, ha ka jaka ki 12-13 tylli ki kali,tang kawei ka bos ka lah ban iaid.”
 kala rai ba shen kan sap hah ia ki jingai jingmut kiba bniah sha ka Sorkar Jylla ba kan leh eiei halor ka jingnang jur ka jingdheng kali ha sor Shillong.){kind=link}