Yn wan ka Indian Super League sha Shillong
Shillong, Nailur 19 : Ka Indian Super League kala pynlong ia ka jingleh survey bad kala ai dak ba ka Jawaharlal Nehru Stadium ha Shillong, ka dei kaba lah biang nadong hadong ba pynlong ia ki jingialehkai hala iing (home match) jong ka North East United FC hapoh ka league.
Ia kane ka khubor la pynsngew da u CEO ka NEUFC Mandar Tamhane haba iakren bad ki lad pathai khubor hynne ka sngi Palei.
“Ka NEUFC hi kam kut tang ha ka jingialehkai phutbol ha kylleng ki jaka jong ka Thain Shatei Lam Mihngi hynrei ban noh synniang kaba don jingmut sha ka kam ialehkai phutbol la ka dei naduh ki shnong ki thaw bad ki Residential Academy” ong u Tamhane.
Haba iaroh ia ka jingshngshit phutbol da ki paidbah ha Shillong, une u CEO ula ong “Phim ju iohi ia kum kane ka jingieid bad ka jingsngewtynnad ia ka phutbol, ngi iohi beit tang ia ka cricket” haba kren ia ka jingshongshit ki paid ieid phutbol ka Shillong ha ka Durand Cup ba dang shu kut haba ai khublei ruh ia ka synniang jonng ka Sorkar Jylla ban buh ia ki fan-park ha kylleng jong ka Nongbah.
“Ka Shillong ka lah ban dei kawei par ka nongbah jong ka kam ialehkai phutbol ha India” ong u Tamhane, ka jingkren ka ban pynkmen ia ki hajar hajar ngut ki riew ieid phutbol ha Meghalaya.
Da kum kane ka jingkyrshan bad ka jingdon ha lyndet jong u paidbah, u CEO ula ong ba ka long kaba kongsan ia ka NEUFC ban wan ialehkai ia ki jingialehkai hala iing ha Shillong.
“Kino kino ki kynhun ki donkam ban ioh ia kum kane ka jingkyrshan, la ka dei ka Northeast lane ka kynhun ialehkai ka Ri India” ula ong.
U Mandar Tamhane ula iathuh ba ha ka jingiakhun semi phai ka Durand Cup hapdeng ka Shillong Lajong bad ka NEUFC ha Shillong, ka kynhun na ka Indian Super League (ISL) kala pynlong ia ka survey ban peit la ki jingdonkam baroh kiba don ha JN Stadium kila biang pura ne em ban pynlong ia ki jingialehkai ISL.
Haba bun ia jan baroh kiei kiei, ka kynhun na ka ISL kala thoh ia ki katto katne ki jingai jingmut sha ka Sorkar Jylla khnang ba ka JN Stadium kan long 101% kaba biang nadong hadong ban lah pynlong ia ki jingialehkai ISL.
“Ka ISL kala ai ka jingiatreilang ban lah pynlong ia ki jingialehkai hangne (Shillong) bad nga tharai ba shuwa ban kut kane ka samoi ialehkai lehse ha u bnai Rymphang-Lber, ka NEUFC kan sa ialehkai ia 2-3 tylli ki jingialehkai hala iing hangne ha JN Stadium” ong u CEO ka NEUFC.
Haba bynrap ia ki jinkren u CEO, u Nongialehkai ba shakhmat ka NEUFC ba na Assam Parthib Gagoi ula ong ba ka don ka jingiapher bak ly bak haba ialehkai ha Guwahati bad ha Shillong. Ula ong “Ki paidbah ki kham bun hangne ban ha Guwahati” haba kdew ia ka jingkongsan ban ialehkai hakhmat u paid nongkyrshan hala iing.
U samla Redeem Talang uba dei u rang ialehkai Khasi ba marwei ha ka NEUFC mynta ka samoi, ula pynpaw ba u kwah bha ban wan ialehkai hala ing hakhmat u paidbah ka Shillong.
