Aizawl, Nailur 17: Ka kynhun CID ha ka 16 tarik Nailur, ka la ioh ban kurup palat 40 kg u drok Methamphetamine bad palat 3 kg u drok heroine ba shongdor da ki klur tyngka ha khapsor jong ka Aizawl,Mizoram.
Nalor kine ki drok la kem ruh ia ki briew kiba la suba ba ki dei ki nongkhaii ba kynthup ia katto katne ki nong shong shnong ka Ri Myanmar.
Hadien ka jingioh ia ka khubor kaba thikna, ka kynhun CID ka la pynlong ia ka jingkhynra kaba jur bha bad la ioh bat ar tylli ki kali ha Hualngohmun ha ka por kumba 10 baje mynmiet.
Haka jingkhynra iaki kali, la kurup 32.013 Kg (32 bundles) u drok ba la suba ba u dei u methamphetamine uba shongdor haduh T.4.14 klur bad 249 gram (21 paket) drok heroin uba shongdor haduh T.7. 5 lak, ba la buhrieh hapoh ki jingkhang jong ka kali kaba don ia u nombar MZ-01-N-3642.
La kem ia u nongniah jong katei ka kali u la tip kyrteng kum u Lalthansiama (26 snem) naka shnong Khawmawi ka Ri Myanmar.
Ha ka kali kaba ar, la kit 8.021 Kg (8 bundle) u drok ba la suba ba u dei u methamphetamine uba shongdor haduh T.1.04 klur bad 565 gram (47 packet) u drok heroin ba shongdor 16.9 lak kaba la buhrieh kumjuh hapoh ki jingkhang jong katei ka kali kaba don ia u nombar MZ-02-A-9053.
La kem ia u nongniah jong katei ka kali, uba la tip kyrteng kum u Zoremmawia, uba dei ruh naka shnong Khawmawi ka Ri Myanmar.
Ha ka step 17 tarik, ka kynhun CID kala ioh bat sa kawei ka kali ba don ia u number MZ-01-G- 5672 ha Muanna Veng, Zuangtui.
Hadien ba la talasi ia ka kali la ioh ban kurup 2.284 Kg (196 paket) u drok ba la suba ba u dei u heroin ba shongdor T.68.52 lak.
U nongniah jong ka kali ba tip kyrteng d u David na Zokhawthar, u la ioh ban phet krad, hynrei la kem ia u nongbud ba suba bad uwei uba u dei u khynnah rit.
Ha kane ka jingkhynra baroh kawei ka kynhun CID la ioh ban kurup haduh 40.034 Kgs u drok ba la suba ba u dei u Methamphetamine uba shongdor haduh T.5,20,44,200 bad 3.098 Kg u drok ba la suba ba u dei u heroin ba shong dor T.92,94,000.
Ïa baroh ki briew kiba la shah kem la aiti noh sha ki pulit ka Special Narcotics Police Station ha kaba la register ïa ka mukotduma vide Special Narcotics PS Case No.36/2024 katkum ka kyndon 21(C)/29(1)/25 ND&PS Act ba la pule ryngkat bad ka 14A Foreigners Act.
