Shillong, Nailur 15 : Ka Sorkar Jylla kala tyrwa ban pynlut ia palat T.515 klur ban shna ia ki dam pyllang um ha baroh ki 12 tylli ki District ban pynbun ia ki jaka pyllang um ha ka Jylla hashuwa u 2031.
Ka Sorkar hapoh ka EAP-Climate Adaptive Community Based Water Harvesting Project ha Meghalaya bala bei tyngka da ka Assian Development Bank, ka thmu ban shna ia ki dam pyllang um ha baroh ki 12 tylli ki District ban pynbun ia ki jaka pyllang um hapoh ka Jylla, ong ka khubor ba iajan bad ka Sorkar.
Ka Sorkar kala dei ithuh ia palat 532 tylli ki jaka ha ki 12 tylli ki District ban shna ia kine ki dam pyllang um bad ka por kaba la tyrwa ban shna ka dei nhapdeng u 2024-25 haduh 2030-31. Ka jingmang pisa baroh ka long T.515.69 klur.
Hynrei ka khubor ka ong ba ka Tnad kam shym la don satia ia kano kano ka project bala mang kyrpang ban iada ne tyngkai ia ka wah Umiew bad ka Ganol.
Ka jingiada bad tyngkai ia ka wah Umiew bad Ganol kam don project satia kaba la pyntreikam da ka Tnad Soil & Water Conservation.
Ha kajuh ka por, ka Tnad Forest ka dang pynkhreh ban ithuh ia ki jaka don um hapoh ka Jylla ban iada ia ki khamtam kiba hap hapoh ka Shillong Region kum ka Riat Laban Reserve Forest, Laitkor Protection Forest, Mawphlang Reservoir ha East Khasi Hills, ka Wah Khri ha Mairang C&RD Block, ka Nohkreh Biosphere Reserve ha Ri-lum Garo, ka Umiam Water Reservoir ha Ri-Bhoi, ka wah Umphung ha East Jaintia Hills District bad ka wah Myntdu ha West Jaintia Hills District.
Ka Tnad Soil & Water Conservation kum shibynta ha ka jingiatreilang bad ka Tnad PHE, kan sa ai jingiada bad pynkhie im ia artylli ki tyllong um kiba don hapoh ka Greater Shilong Region, kiba kynthup ia ka Umpaitmaw kaba hap ha Mylliem Block bad ka Madan Saisiej kaba hap hapoh ka Mawpat Block.
Nalor kane, ka khubor ka pyntip ba ka Sorkar lyngba ka MBDA/MBMA kala shim ia ki katto katne ki sienjam ban iada ban tyngkai ia ki tyllong um. Kine ki sienjam ki dei shibynta na ka jingialeh ban lah tyngkai ia ka um bad pynbiang ia ka jingioh um ki nongshongshnong ka Nongbah.
