Shillong, Nailur 13: Ka Voice of the People’s Party (VPP) hynne ka sngi kala sdang iaka jingiakhih daka ba shong kyllain mungor ha Madan Malki halor ka jingkiew dor ki mar ki mata.
Kane ka jingiakhih ka dei kum ka dak ban pyrshah iaka jingbym leh suidniew jong ka Sorkar Jylla haba iadei bad ka jingkiew dor ki mar bam hapoh ka Jylla.
Ia kane ka jingiakhih la lamkhmat hi da u President ka VPP bad MLA ka Nongkrem Bah Ardent Miller Basaiawmoit haka jingdon lang kiwei ki MLA ka Party kynthup u MP ka Lok Sabha Dr Ricky AJ Syngkon.
Haba kren shaki lad pathai khubor u Bah Ardent u la ong baka Party kala pyrshang ban rah iaka mat ba kiew dor ki mar bam hapoh ka iingdorbar thawain ban tip iaka daw, balei ki dor jong ki marbam ki kiew bha hapoh Meghalaya.
“Phi la iohi ba ngi khlem ioh lad ban iatai ia kane ka mat bad naka liang u Myntri u la shu buh iaka jubab hapoh ka iingdorbar” la ong u Bah Ardent.
U Bah Ardent u la ong ba naka liang ka Party kala kular ban buddien bad kane ka jingiakhih daka ba snong kyllain mungor kadei tang ka jingsdang ban pynpaw ia ka jingpyrshah bad ka jingsngewkhia halor ka jingkiew dor ki mar bam kaba la palat pud, kaba la ktah iaki ba duk ba suk ha kane ka Jylla.
“Ngi kwah ban tip, kaei ka daw kaba pynlong iaki dor jong ki mar bam ban kiew bha hapoh Meghalaya. Ka Sorkar kadei ban jubab” u la ong.
U Bah Ardent u la kynnoh baka Sorkar Jylla, ka lah ban kam baka jingkiew dor ki marbam ka dei namar baka Jylla kam don iaka Rel, hynrei kata kam lah ban dei ka daw bah.
“Hoid ka jingbym don Rel, ka lah ban dei kawei ka daw. Ka Doh masi ha Dimapur (Nagaland) ka dei T.300 hynrei ha Meghalaya ka long T.500-T.600, ka iapher haduh arshah. Ka daw ka dei hi namar ba don kiwei ki daw” u la ong.
Nalor kane u President ka VPP u la kynnoh baka Jylla Meghalaya ka sakhi iaka jingdon bun tylli ki khyrdop lum khajna, kiba kynthup jong ki Syiem, ki District Council, ki Pulit kiba ieng haki lynti.
“Ki don shi bun ki daw kiba pynlong iaki marbam hapoh Meghalaya ban kiew dor namar kata ngi kwah iakren bad ka Sorkar ba kan wad iaki daw baroh” u la ong.
