Shillong, Nailur 11 : Ka Seng ki Nongthohkot Khasi, Khasi Authors’ Society (KAS) ha ka sngi Balang, ka la rakhe ia ka lyngkhuh snem ba sawphewsan da ka ba sam khusnam sha ki samla ki ba jop kyrdan ba ha khlieh duh ha ki jingpule bapher bapher.
Ka KAS kala pynlong ruh ia ka lympung mir jingtip bad pyllait ia ki kot thymmai da ki dkhot ka seng. Ia kane ka jingrakhe la pynshongkun da ka jingiadonlang u MP ka Lok Sabha Bah Ricky A J Syngkon, uba la kren bun kiei kiei ki ba iadei bad ka ban kyntiew ia ka thoh ka tar, khamtam ha ka ba iadei bad ka ba pynrung ia ka ktien Khasi ha ka Khyrnit Baphra jong ka Riti Synshar ka Ri India.
U Dr. Syngkon u la ban jur halor ka jingdonkam ban pynneh ia ki ktien shnong na kylleng ki thaiñ ha jylla ban pynriewspah ia ka ktien pdeng bad kyntu ruh ban kiar na ka ba pyndonkam da kiwei ki ktien mynder.
Ha ka ba sdang la ioh ka jingkren lamphrang da u Khlieh Rangbah ka seng, Dr D R L Nonglait u ba la batai sani ia ka lynti jong ka seng ha ki sawphew snem tam na ka bynta ban kyntiew ia ka thoh ka tar bad ia ka ktien Khasi sha ki kyrdan ba kongsan ha Ri India bad ha satlak pyrthei.
U Bah Nonglait ula iathuh ba ka seng ka la pyniar hynñiew tylli ki shnat jong ka seng ha jylla bad lai tylli ha kylleng ka Ri India, kum ha Delhi, Bangalore bad Kolkatta. U Bah Nonglait u la kdew ruh ba ki salonsari ba don ha jylla ruh ki la kynthuip ia ka jingpule ia ka thoh ka pule Khasi ha ki kyrdan ki ba hakliar haduh ka Ph D.
Ha kane ka sngi rakhe lyngkhuh snem la sam khusnam sha ki khatwei ngut ki samla ki ba tyngshaiñ ha ki shlem pule ha jylla ki ba kynthup ia ka Ribahunlang Lamarai, Ialammiki Lamare, Josiah Duncan Lyngdoh Mawphlang, Claudia Aurelia Khyriem bad Abigail Ioanna Suchiang ki ba la kiew irat ha ka SSLC bad ICSE. Nalor kine la sam khusnam ruh ia u Pynbha Lynshiang, Menangmankhraw Kharkongor, Ferry Filarisha Wann, Ritilian Diengdoh, Ar Meker Marpna ki ba kiew irat ha ka HSSLC bad Badaker Nengnong Daloi ha ka BA.
Kum shi bynta ban rakhe ia ka lyngkhuh snem, la pyllait lai tylli ki kot jong u Bah Hamles Mylliem Umlong ka ba la jer Ka Antigone, ka kot shaphang ka Kheiñkur Kheiñkha Khasi da u Bah Raphael Warjri bad ka kot shaphang ka riti mawbah mawbynna, ‘The Megalithic Culture of Khasi Jaintia Hills da u Dr Marco Babit Mitri.
Ia kitei ki kot la pyllait paidbah da u kongsan Bah Ricky A J Syngkon ha ryngkat ki kynrem lyndan ha rynsan ba kynthup ia I Kong Silbi Passah, Bah Spiton Kharakor, Bah Laborious Manik Syiem, Dr Eureka Lyngdoh, Principal Sankardev College, Dr D R L Nonglait, Dr R P Kharshiing, Saiñpyniar, bad Bah K D Ramsiej, Symbud Khlieh Rangbah ka seng Khasi Authors’ Society.
Ha ka kylla sngi ka la don ka lympung mir jingtip ba la kren da ki dkhot rangbah ka seng bad uwei u samla ia ka phang jong ka Shillong- Mynnor Mynta bad Lashai.
