Nongpoh, Nailur 07: Ki arngut ki heprit na ka shnong Umsaw Nongkharai, Ri Bhoi District, kila shah jied ban leit ïashimbynta ha ka rynsan ïa kura kaba la tip kum ka IFMA Youth World Muay Thai Championship kaban long ha ri Thailand.
Kitei ki arngut ki heprit kiba la shah jied ban leit ïakhun ha katei ka rynsan ki kynthup ïa ka Dasngewtngen Nongrum bad ka Ailin Grace Kharbyngar ha kaba kin sa mih na ka jylla ban leit sha katei ka lympung iakob kaban sdang naduh ka 11 tarik haduh 21 tarik u Nailur, 2024.
Ha shwa ba kitei ki heprit kin leit sha katei ka ri, na ka liang ka Dorbar Shnong Umsaw Nongkharai kila pynlong ïa ka prokram ban kitbok kitwriang ïa kitei ki heprit bad la aiti ïaka song pisa kum ka dak ban kyrshan lem ia ki ha ka leit ka wan.
Ha kane ka sngi la ïadonlang u Bah A Sun, Rangbah shnong ka Shnong Umsaw Nongkharai uba dei ruh u Nonghikai jong ki khynnah ïalehkai Muay Thai, u Bah Tony Shylla Secretary Shnong, ki kmie ki kpa kem bad ki khun samla ka shnong.
Na ka liang ki nongïalam shnong kila ai ïa ka jingkitbok kitwriang ïa kitei ki heprit ki ban leit ïashimbynta ha katei ka jingiakob, ba kin don ha ka met kaba koit ba khiah khamtam haba ki leit iakhun shabar jong ka Ri India.
