Shillong, Nailur 07: U Nongmihkhmat jong ka Amlarem Constituency bad u Chief Adviser jong ka sorkar jylla u Bah Lahkmen Rymbui ula ong, ba ka sorkar ka don ia ka jingthmu ban sdang biang ia ka jingiakren na ka bynta ban pynbeit ia u pud u sam hapdeng ka jylla Assam bad Meghalaya.
Halor ka jingkylli, halor ka rukom treikam ka sorkar jylla ba kan iakren pynbeit ia u pud u sam ha ka wat ka baar, u Bah Rymbui uba long ruh u Chairman jong ka committee ka Ri-Bhoi ban pynbeit ia u pud u sam, ula pynpaw ia ka jingskhem jingmut ba kane ka jingiakren pynbiet kan iaid shaphrang.
“Nga dap da ka jingsngewkmen, ba la pyndep ïa ka bynta kaba nyngkong. Hooid, ngim lah ban pynbeit lut ia baroh ki jingeh, hynrei ia kiba bun hi ki jingeh la lah ban pynbeit. Nga sngewkmen, ba ka sorkar kala sdang ia ka kam na ka bynta ka bynta ban sdang ia ka jingiakren ha ka wat ka baar, kumba la pynpaw da u Myntri Rangbah ka Jylla, ba ka jingiakren kan sa sdang noh naduh ha u bnai Risaw. Ki jingeh kin don namar ban pynbeit ïa kano kano ka jingïakajia ka wan ryngkat bad ki jingeh, hynrei da ka mon jongka kam saiñpyrthei bad ka jingsngewthuh bad ki paidbah ha ki thaiñ khappud, ngi kyrmen skhem ba ngin lah ban pynbeit ïa kane ka jingeh kaba la sahteng la bun snem” ong u Bah Rymbui.
Ha kaba iadei bad ka jingdawa ban khmih bniah biang ia ka jingiateh ba la iasoi ha ka wat kaba nyngkong jong ka jingiapynbeit pud, u bah Rymbui ula ong, “Ngi hap ban iakren ia baroh ki mat kiba baroh ar tylli ki sorkar kila ia mynjur lang. Ngim lah ban pynsngewbha ne pynhun ia baroh, hynrei lada don ki jingeh kiba shisha kiba donkam ban bishar biang, ka jingmut jingpyrkhat jong ka sorkar kala long lypa kaba la plie.Hynrei ïa ki jingeh kiba khraw naduh ka wat kaba nyngkong la pynbeit katba lah.”
Katba u Myntri ka sorkar jylla bad u nongïalam ka BJP u Bah AL Hek ula pdiang ïa ka rai ban sdang noh ïa ka bynta kaba ar jong ka jingïakren bad ula ban jur ia ka jingdonkam ban buh hakhmat eh ia ki jingmyntoi jong baroh kibadon bynta lang.
“Ngi kwah ban pynbeit noh shi syndon ia kane na ka bynta jong baroh bad kaban long shi rta. Khamtam haba ki Myntri Rangbah jong baroh ar tylli ki jylla, kila don ia ka jingïakren kaba bniah, ka jingmut jong nga, ka long ba dei ban pyrkhat ruh ïa ki trai shnong ri shwa ban shim ia ka rai kaba khatduh ha kaba iadei bad ka jingpynbeit ïa u pud u sam,” ong u Hek.
Haba kylli hato lah ne em ban pynbeit kloi ia ka jingeh ha khappud, u Bah Hek ula ong, “Lada baroh ar tylli ki jylla ki ia shong ban iakren da kaba pyndonbynta lang ia ki traishnong, lah ban pynbeit ia ka jingeh. Hangno ka jingeh khlem ka jingpynbeit? Na ka bynta kawei pa kawei ka jingeh, ka don beit ka lad ban ia pynbeit.”
Ula banjur da kaba ong, “Ia ki mat dei ban ia pynbeit hapdeng ki artylli ki jylla da kaba shim lang ia ki jingeh kaba mad da ki nongshong shnong”.
Kum ban shu kdew,u Myntri Rangbah ka jylla u Conrad K. Sangma bad u Myntri Rangbah ka Assam u Himanta Biswa Sarma kin sa sdang biang ia ka jingiakren pynbeit pud ha u bnai Risaw na ka bynta ban pynbeit noh ia ki 6 tylli ki jaka kiba don hapdeng ka jingiakajia kaba kynthup ia ka Langpih, Psiar, Khanduli, Block I bad Block II.
