Shillong, Nailur 04: Ka sorkar jylla kan pyndonkam da ki teknoloji thymmai kiba ju pyndonkam ha kylleng satlak ka pyrthei ban iada ia ka madan phlang ka JN Stadium, ha ka jinghna ia ka rynsan ban wan tem u Bryan Adams haka 10 tarik Nohprah 2024.
Ia katei la pyntip da u Myntri Rangbah ka Jylla u Conrad K. Sangma hadien ba mih ka jingsngewkhia na ki paidbah ba kan don ka jingshah ktah jong ka madan ialehkai kaba tyhymmai ha JN Sports Complex kaba la ioh ruh ia ka jingiaroh ha ka jingpynialehkai ia ka Durand Cup kaba dang shen.
U Conrad Sangma ula pynthikna ba yn pyndonkam da ki teknoloji kiba kyrpang, kaba la pyndonkam ha satlak ka pyrthei ha ki madan ialehkai football bad cricket, na ka bynta ban iada ia ka madan ialehkai ha ka por ba pynlong ia ki jingialang paidbah, ki jingialang ne ka Concert.
“Ki kor teknoloji kiba don mynta, ki ailad ia baroh kawei ka madan ialehkai kaba mih phlang ban shah tap da ka rynsan kaban iada kyrpang, kaban pynthikna ba ki paidbah kin ym ioh ban iuh ia u phlang ne ban pynjot ia ki” ong u Myntri Rangbah.
Ula ong ruh ba ka sorkar kan pynthikna ba ki nongpyniaid ia ka concert kin bud ryntih da kaba pyndonkam da ki kor teknoloji ban iada na ka jingsniew jong ka madan ialehkai.
“Ka jingkitkhlieh kan long ia ki nongpyniaid ba kin pyndonkam ia katei ka rynsan bad ngi ngin khmih bniah arsien ia ki teknoloji ban pynthikna ba ki dei ban long katkum ka kyndon kaba la buh (standard) hashwa ban ioh ia ka jingmynjur” ong u Sangma.
Hynrei u Myntri Rangbah ula ong pat, ba ka lah ban don ka jingsniew kaba khyndiat khynsoit ia ka madan ialehkai hynrei yn lah ban thung biang ia u phlang hapoh jong ka 7 sngi bad kane kadei kaba la leh ha kum kitei ki jingjia kiba la jia ha ka pyrthei baroh kawei.
U Myntri Rangbah ula batai ruh ia ka daw ban pynlong ia katei ka concert ha katei ka jaka da kaba ong, “Ka jingpynlut na ka bynta katei ka jaka ka dei ban don ka jingpyndonkam na ka bynta kiba bun ki bynta ban ioh pynmih ia ka khajna bad ban ioh ban pyndonkam pura ia katei ka jaka”.
