Shillong, Nailur 04: U Symbud Myntri Rangbah ba khmih ia ka Tnad District Council Affairs (DCA) Bah Prestone Tynsong ula pynshai ba ka jingpynjlan ia ka samoi treikam ka KHADC bad JHADC sa hynriew bnai ka dei kaba la leh kat kum ka Ain.
Ula ong ba ka jingpynjlan ka dei kaba la leh halor ka nongrim ban lah pyndep ia ka jingpynbeit thymmai ia ki constituency bad ban pyndep ia ki jingdonkam haba iadei bad ka jingpynbna ia ki Electoral Roll jong ki MDC Constituency.
Lah ban kdew hangne, ka Sorkar Jylla dang ha ka taiew bala lah, kala pynbna ban pynjlan biang sa hynriew bnai ia ka samoi treikam jong ka KHADC bad JHADC namar ka jingdon ka jingpynbeit thymmai ia ki constituency.
“Ka AD Rules ka ai bor ba lah ban pynjlan ia ka samoi treikam ki ADC haduh 12 bnai bad lada ym lah ban pynlong ia ka elekshon hapoh ka 12 bnai ba la buh, yn hap pynjari noh da ka Administrator Rule” ong u Bah Prestone.
Halor ka elekshon, u Bah Prestone ula ong ba ka jingpynkhreh ia ka elekshon ka KHADC bad JHADC kala iaid shakhmat bad ka jingpynjlan ia ka samoi treikam kan kut noh ha ka 5 tarik Lber 2025.
