Shillong, Nailur 03 : U Myntri Sorkar Bah Kyrmen Shylla ha ka sngi Ba-ar, ula ong ba ka Ain kan sa leh ia kaba donkam pyrshah ia kino kino ki briew kiba donkti ha ki kam khaii droks.
Haba iakren bad ki nongthoh khubor, u Bah Kyrmen ula ong ba ka Ain ka dei ruh ban leh eiei pyrshah ia kito kiba kynnoh ba u Myntri Sorkar u donkti ha ka jingkhaii droks khlem da pyni ia ka sakhi satar.
Haba ban jur ia ka jingdonkam ban rat dyngkhong ia u droks na Jylla, u Myntri ula ong “Kam dei kaba bha iano iano ruh ban shu kynnoh pyrshah ia ki dkhot jong ka Liang Synshar ne Liang Pyrshah lane ia ki riew paidbah khlem ki sakhi satar ba u/ka ki donkti ha ka jingkhaii droks bad lum pisa na u droks”.
Ula bynrap “Ka long kum ka khana biria bad kum ka jingiakhana ha iew ha hat ban shu kynnoh ia kino kino ki dkhot lane ki riew paidbah ba ki donkti ha ka kam khaii droks khlem ki sakhi satar”.
Haba kylli halor ka rai jong u Nongialam ka Liang Pyrshah Dr Mukul Sangma ba un thoh sah u Myntri Rangbah Duh ka Ri pyrshah ia ka jingkhaii droks, u Bah Kyrmen ula ong “Kan bha eh lada u leh lada ka dei kaba shisha hynrei lad aka dei ka jingkynnoh thok, nga ngeit ba ka Iingksahri ruh ka dei ban leh eiei pyrshah ia kito ki briew kiba shu kynnoh lamwir lamtham khlem ki sakhi satar”.
U Bah Kyrmen ula pynpaw ba ka nongrim jong ka Sorkar ka long kaba shai bha ba kino kino kiba donbynta ha ki kam khaii droks kin ym ioh iaid laitluid.
