Shillong, Nailar 29 : Ki Pulit ka East Jaintia Hills, kila ioh ban tam ia ka metiap jong uwei u nongialam ka Awami League ka Bangladesh, kaba la thiah lyngktar bad kem pyut ha kawei ka bri kwai kaba marjan ka khappud ka Bangladesh ha East Jaintia Hills.
Ia kane ka metiap la lap ha ka 26 tarik Nailar na ka bri kwai kaba don ha ka thain Dona Bhoi jong ka East Jaintia Hills District, kaba jngai kumba 1.5 km na khappud Indo-Bangladesh.
Ki Pulit kila ioh tam ruh ia kawei ka passport Bangladesh kaba dei ha ka kyrteng Ishaque Ali Khan Panna na kane ka metiap.
Ia kane ka metiap la pynkit noh sha Civil Hospital, Khliehriat ban pyndep ia ka post mortem. Ia ka metiap la buh ha ka jaka buh metiap jong ka hospital ban wan pynithuh bad kam ia ka met.
Ki Pulit kila register case halor kane ka jingjia bad ka jingtohkit mynta kala iaid shakhmat.
