Nongstoin, Nailar 23 : Ki nongri Niangryndia jong kawei ka thain ha West Khasi Hills, kila shu shri iam bad jaw ummat namar ka jingshah pynjulor lut ki jingthung kiba ju bam ki niangryndia ha ka thain.
Kane ka jingpynjulor kala jia ha ka shnong Kyllonmathei, Shallang, West Khasi Hills bad la pyntip ba ia kine ki jingthung la pynjulor da ki kynja khniang ki bym lah satia ban ithuh ne tip kyrteng.
Ki nongri Niangryndia ka thain haba iakren bad ka ‘Shlem’ kila pyntip ba kine ki khniang kila bam duh lut ploin ia ki sla jong u dieng ba ju aibam u niangryndia, ba ki da rep kyrpang ban pynroi ia kam pynmih ksai ryndia.
Kila pyntip ba kane ka jingshah pynjulor kine ki jingthung ha kine ki khniang kynsha, ka dei kaba dang shu jia mynta katno haba iathuh ruh ba kine ki kniang kila bam lut ploin ruh wat ia ki sla jong u phandieng.
Kila pyntip ba kane ka jingwan lynshop kine ki khniang kala jia ym tang ha kawei ne artylli ki lyngkha hynrei kala jia ha manla ki jaka rep kiba don marjan.
Kine ki nongrep kila kyntu ia ki bor ka Sorkar khamtam eh sha ka Tnad ba dei khmih ba kan wan khmih bad kner lem ia ki lad jingiarap.
