Shillong Nailar 21: Ka Department of Biomedical Engineering (BME), North Eastern Hill University (NEHU), Shillong da ka jingiatreilang bad ka Meghalayan Medical Drugs and Services Limited (MMDSL), jongka sorkar Meghalaya, hynne ka sngi Balang, kala pynlong ia ka jingai jinghikai Biomedical Waste Management (BWM) Course na ka bynta ki nongtrei ka koit ka khiah ha ki jaka ai jingsumar kiba don ha kylleng ka jylla Meghalaya.
Kane ka BWM Certificate Course kala sdang naduh ka 19 tarik haduh ka 23 tarik u Nailar 2024 da ka jingthmu ban hikai haduh 400 ngut ki nongtrei ka koit ka khiah ha ki 18 bnai ban wan. Kane ka jingthmu ka long ruh ban kyntiew ia ka jingtip bad jingtbit jong ki nongtrei ka koit ka khiah ha ka jinglum jinglang ia ki jaboh jong ki hospital, kaba dei ka mat kaba kongsan bha na ka bynta ban pynthikna iba kan don ka jingkhuid bad jingshngain ha ki jaka ai jingsumar.
Ka Dr. F.V. Kharshiing Director jong ka Directorate of Health Services (MI), kum u kongsan haba kren ha ka jingialang kala pynpaw ia ka jingkongsan jong ki prokram ai jinghikai bad kala banjur ba ka long kaba donkam kyrkieh ban ai iaki jinghikai pyntbit ia ki nongtrei ka koit ka khiah ha ka rukom treikam ha kaba iadei bad ka jinglum ia ki jaboh kiba mih na ki hospital kiba don ha kylleng ka jylla bad kala ai jingiaroh ia ka sorkar jylla bad iaka MMDSL kaba la shimkhia ia kane ka sienjam.
U Dr. Dinesh Bhatia, Course Coordinator, NEHU Shillong, ula ai ka jingbatai ha kaba iadei bad kane ka jingai jinghikai, kaba kynthup ia 50% ki jinghikai ia kaba hap ban trei ne leh dalade bad ula pynpaw ka jingsngewnguh ïa u Secretary ka Health & Family Welfare bad u Managing Director ka MMDSL u Ramkumar S, IAS, ka kynhun jong ka MMDSL bad ka Sorkar Meghalaya, halor ka jingïatreilang bad ka jingshimkhia jongki ban kyntiew ïa ka sap ka phong ha ka jylla.
U Dr. Bhatia ula ban jur ba kum kine ki prokram ki long kiba kongsan ha kaba pynsngewthuh bad ai jinghikai ïa ki nongtrei ba ïarap ha kaba pynïaid ïa ki jaka ai jingsumar.
U Prof. G. Bez, Director ka IQAC, NEHU ula ïaroh ïa ka Biomedical Engineering kaba la pynlong ïa kane ka jingïalang bad ula ong, ba kan don ka jingkylla bad kan kyntiew ïa ka koit ka khiah jong ki paidbah da kaba kyntiew ia ka jingtbit bad ia ka sap jong ki nongtrei ka koit ka khiah.
Ha kane ka jingïalang la pyllait paidbah ruh ïa ka kot jinghikai kaba 200 sla halor ka Biomedical Waste Management bad la sam ia kane ka kot sha baroh kiba la wan iashimbynta haka jingialang.
