Pynim ka SURE ia ka shna “Khon Mu-ke’ | Ka jingpynkupbor ia ki samla ha WJH

Shillong, Nailar 21: Kum ka jingpyrshang ban pynim ia ka kam shna jingshna nala tynrai bad ban pynkupbor ia ki samla, ka Society for Urban and Rural Empowerment (SURE), kala pynlong ia ka prokram ai jinghikai kaba kham pher tam ha ka Jylla ban kyntiew ia ka ioh ka kot ki samla.

Haduh 30 ngut ki samla kila ioh ia ka jinghikai kumno ban shna khun kai ne khun bynriew nala tynrai, kiba ki khot ha ka ktien Pnar “ Muke ne khon Mu-ke”.

Ka SURE kum kawei na ki seng ai jinghikai bala ithuh da ka sorkar lyngba ka Meghalaya State Skill Development Society, kala pynlong ia kane ka jingai jinghikai haduh shibnai kynthih ha ka jaka ai jinghikai ne Training Centre jong ka SURE kaba don ha Thluwania, Ladthalaboh, Jowai.

Ia kane ka buit ai jinghikai ne ka jingmut la wanrah da u Dr HH Mohrmen uba khlieh ia ka SURE, uba la pynwandur ia ka na ki jingkynmaw ia ka jinglong khynnah ba kumno ki para kynthei jong u, ki shna khunbynriew.

Ia kine ki khun bynriew la shna na ki jain lyngkhot bad la pynriam pat da ki jain kup jain sem nala tynrai,kala pynlong ia ki kum ki khun bynriew kiba kham pher bad kiba i iapbiej bha.

I kong Ibaphimon Shylla iba dei i Fashion Designer bad ka nonghikai, ila ong ba ia kine i khunbynriew yn die ha ki dukan die tiar sah jingkynmaw ne Souvenir shop, ki dukan kiba don ha ki thaiñ ba wan ki nongjngoh kai pyrthei ne tourist spots bad ki iew online, ka ban ai ka lad kamai ia ki nongshah hikai.

Haka jingïakren bad u U Dr Mohrmen uba long u khlieh kane ka Seng ula ong ruh ba “ka SURE kam kwah ban ai ki jinghikai kiba kiwei pat ki ju ai, hynrei ka kwah ban sdang da kaba thymmai kaba ym pat ju don ba leh, kiba lah ban aikam aijam ïa ki samla”.

Ka kong Ibaphimon Shylla ka Fashion Designer kaba long ka nonghikai, kala ong “ Ine i khunbynriew iba ngi shna i dei iba kham pher namar, i dei i khun bynriew tynrai (traditional doll) iba phin ym ïoh satia ha ïew ha hat”.

Haba la kylli nangno kane ka jingmut ban shna da ki khunbynriew tynrai ka wan? Ka kong Ibaphimon kaba dei ruh ka master trainer ka iathuh ba ïa ka jingmut la wanrah da u Dr H.H.Mohrmen haba u kynmaw mynba u dang khynnah ba ki para kynthei jong u ki shait shna khun bynriew da ki jaiñ lyngkhot kiba tam na duka jaiñ i mei i pa jong ki.

“Ula ong ïa nga bad ïa ka hymmen jong nga ka Niwanka Shylla ba lada ki lah ban hikai shna ki khun-jakai te naka liang ka SURE kan wad lad naka MSSDS ban pynlong ïa kane ka training. Nga ong ïa I ba nga lah bad ngi la wan rah ka nuksa ban pyni ïa I” kala iathuh.

U Dr Mohrmen ula ong “Kawei pa kawei ka jaidbynriew ne ka kolshor ki don la ki rukom ba shna khunbynriew bad ha ka jaidbynriew jong ngi ruh, ngi ju shna ïa kita kiba ngi khot “ki Muke ne ki khon Muke”.

“Ka jingmut ka long ban shna ïa ki khun-bynriew kiba yn pynithuh ïa ka jinglong kyrpang ka jaidbynriew jong ngi, da kaba pyndonkam ïa ki jaiñ kup jaiñ phong kiba long ki tynrai jong ngi hi.”

Ka kong Ibaphimon kala ïathuh ba ryngkat ka jingïatreilang ka kong Ilasiewdor Gashnga, Felishia Liam kiba dei ki nongtrei ka SURE ha ryngkat ka jingkyrshan u ma Lambor Suchen District Skill Development Officer, West Jaintia Hills, la lah ban pynkhreh ïa ka syllabus ban wan rah ïa kane ka training ha kane ka centre.

Haba kylli kaei kaba kine ki khun bynriew ki don bad balei ba ki briew kin thied ïa kine ki khun ja kai jong phi? Ka kong Ibaphimon ka ong ba “katba ngi lah, ngi ïaleh ban khmih ba ki khun jakai kiba ngi shna kin phong da ki jaiñ kup jaiñ sem tynrai jong ngi kum ka “khyrwang, thoh-saru, muka, ryndia.”

“Ki Pnar ki War ki don ïa ki riam tynrai kiba itynnad, kiba pher bad kiba iphuh iphieng kumta ngin pyndonkam da kine ban pynitynnad ïa kine ki khun-ja-kai jong ngi. Nalor ki jaiñ ki nep ki khor ki khriam, ngi don ruh ïa ki jingdeng kum ki paila, ki khadu, laket and kynji kiba long ki jingdeng tynrai jong ki War bad ki Pnar kiba ngin pyndonkam ban pynitynnad ïa kine ki khun kiba ngin shna” kala ong.

Kumno shaphang ka jingbuh dor? “Ha kaba ïa dei bad ka dor, ngim artatien ba ki khun jakai kiba ngin pynmih ngin khamlah dor namar ba kiba bun ki tiar kiba ngi pyndonkam ban shna kine ki khun bynriew, ki dei ki lyngkhot jaiñ kiba ngi ïoh na ki dukan jaiñ jong ngi,” pynshai ka kong Ibaphimon.

“Nga ruh nga don ka dukan suhjaiñ ha ïawmusiang pyrshah ka SBI, Jowai iba nga ai kyrteng Phimon Boutique, namar kata ki jaiñ lyngkhot kiba ngim donkam shuh, ngi pyndonkam hangne, ym don jingartatien ba kane ka ïarap ban pynjem dor ïa kine ki mar kiba ngi pyndonkam,” kala bynrap.

Ka kong Ibaphimon Shylla nongai training ila ïathuh ba kine ki khunbynriew kiba shna ki kham pher bad ngi shna ruh bunjait ki khun bad nalor ki khun (dolls), ngi shna ruh ïa ki khun ban buhkai ha kali (hanging doll) ne kiba ngi lah ban pyndonkam ban buh shabi (key chain).

Ha kaba ïadei bad ka ïew, i kong Ibaphimon i ïathuh ba kin die ïa kine ki khun ha ki dukan die tiar sah jingkynmaw (Souvenir shop), ha ki dukan kiba don ha ki thaiñ ban wan ki nongjngoh kai pyrthei (tourist spots).

Ka kong Iba ka pynshai ruh ba ïa kine ki khun Muke lah ban pyndonkam ruh ban ai return gift haka por ba don ba ïathoh. “Nangta ngin pyndonkam ruh ïa ki lad pathai khubor kum ka Instagram, WhatsApp, ka Facebook bad kiwei pat ki rynsan ruh ban pynïaid ïew ïa ki. Ngim artatien ruh ba kin don bun ki nongthied lada ngi die ïa kine ki khunbynriew online ne lyngba ka internet.”

Kawei na ki nongwan shim training ka samla Lina Timung naka shnong Barato ka ïathuh ba ka don jingkyrmen ba kine ki khun muke kin ïaid ïew bha. Ka ïathuh ruh ba ki don ka dukan suhjaiñ bad khlem artatien kin pyndonkam ïa ki jaiñ ba tam na dukan bad kane ka pynduna ïa ka jingbret ïa ki jaiñ bym donkam shuh.

Ka S. Suchiang na ka shnong Jowai kaba long kawei pat ka nongshim training ka sngew skhem ba kane ka training kan ïarap ïa I ba in sdang ban sengkam lajong bad khlem artatien in sdang hi ban leh ïa kane ka kam. Kawei kaba baroh 30 ngut ki nongshim training ki ïa mynjur ka long ba manba ki buh ïa ki khun kiba ki shna ha ki social media handle jong ki, ki paralok ki ïaroh bad pan thied ruh ïa ki khun muke kiba ki shna. “Kane ka pyni ba ka ïew kala don lypa,” la pynkynkut ka kong Ibaphimon Shylla.