Itanagar, Nailar 19: Ki Pulit ka Arunachal Pradesh, kila kem ia 5 ngut ki runar kiba la kynnoh donkti ban rahbor bad leh beijot haduh 5 sngi lynter ia kawei ka khynnah ba dang 13 snem ka rta ha Daporijo, Arunachal Pradesh.
Katkum ki thymmei khubor, la ong ba katei ka jingjia ka la jia ar taiew hashwa ka jingleh beijot bad pyniap ia ka doktor ha R.G. Kar Medical College and Hospital ha Kolkata myn ha ka 5 tarik u August, bad ka la paw pyrthei ar sngi mynshwa.
Kine ki san ngut ki runar ki kyrteng u Bali Kaji, u Tapong Baring, u Raju Lomdak, u Jepu Leya ba khot kyrteng kum u Jack Sorum bad u Nanesh Nayam.
Katkum ka jingïathuh jong ki pulit, u hynmen jong katei ka khynnah u la ujor da ka ejahar da kaba kynnoh ba la set be-aiñ ïa kane ka khynnah ha kawei ka jaka ha iew Gandhi jong ka Daporijo haduh 5 sngi bad la leh be-ijot ïa ka.
“Ngi la kem ia u briew ba hakhmat eh ha ka sngi ba ngi la register ia ka case. Ia kiwei pat ki saw ngut la kem hadien ba la tohkit ia u. Hadien ka jingpeit bniah da ki doktor, ia kane ka khynnah la aiti noh sha ki kmie ki kpa jong ka,” ong u heh pulit.
Ia kine ki san ngut la pynngat hapoh ki kyndon jong ka Bharatiya Nyaya Sanhita bad ka POCSO Act.
