Shillong, Nailar 19 : Ka National People’s Party (NPP) kala pynkhreh shaid shaid ban pdiang sngewbha ia ka jingwan iasoh ki MLA ka Congress sha ka sem jong ka mynta ka janmiet sngi Nyngkong.
U Myntri Rangbah ka Jylla Conrad K Sangma, uba dei ruh u National President ka NPP, un sa wan phai noh na Ri-lum Garo, ban iadon lang ha ka jingialang pdiang ia ki MLA ka Congress ha Shillong.
U Myntri Rangbah un plie ia ka Rongjeng Model College mynta ka step sngi nyngkong bad hadien kane, un sa wan phai beit beit sha Shillong.
Kat kum ka khubor ba ioh lum, kine ki MLA ka Congress ki dei u MLA ka Nongstoin Bah Gabriel Wahlang, MLA ka Mawhati Bah Charles Marngar bad ka lah ruh ban kynthup ia u MLA ka Umsning Dr Celestine Lyngdoh, uba la paw kyrteng la shitaiew tam mynta ban leit iasoh noh sha ka NPP.
Ka Meghalaya Pradesh Congress Committee (MPCC) ha ka sngi thohdieng, kala sospon ia arngut na kine ki MLA-Bah Gabriel Wahlang bad Charles Marngar haduh 6 snem namar ka jingiadon jingiadei bad ka Sorkar MDA bad ka jingleh ia ki kam ba long pyrshah ia ka party.
Hynrei, ka MPCC ka dang map ia u Dr Celestine namar ba ula wan sha ka jingialang ba kala khot ban iakren halor kane ka kam.
Kane ka rai jongka MPCC kala pynthikna ia ki hamsaia bad ruh ia ka jingleit iasoh jong u Bah Gabriel bad u Bah Charles sha ka NPP.
Kumba long mynta, ka Congress ka don 4 ngut ki MLA ha ka Iingdorbar Thaw Ain ka Jylla. Ban kiar ia ka jingshah mait kyrteng kum ki MLA hapoh ka Anti-Defection Law, haduh 2/3rd lane 70% majority ka dei kaba donkam, kaba long haduh 3 ngut ki MLA.
Hynrei kaei kaba la thikna ka long ba ka jingleit pyniasoh ki MLA ka Congress sha ka NPP kan long mynta ka janmiet.
Ka Congress kala pyrshang ban bat ia u Dr Celestine Lyngdoh khnang ban pynap ia ki 2 ngut ki MLA ha ka ain kyntiap seng lada ki kyntiap seng hynrei kaei kaban jia bad kaei ka ban long ban man kan sa paw shai shibit janmiet.
Ka NPP kala don 28 ngut ki MLA ha ka sem mynta, bad da ka jingwan iasoh sa kine ki 3 ngut, ka jingdon MLA ha kane ka Party kan kynjoh ia ka 31 ngut, kaba la biang pura u nombor ban synshar marwei ha ka Sorkar.
Ki khubor hamsaia kila saphriang ruh kylleng ki jaka ba da ka jingwan iasoh kine ki MLA ka Congress, ka NPP ka lah ban knieh noh ia kawei ka shuki Myntri Sorkar na ka United Democratic Party (UDP) ban ai bujli ia uwei na kine ki MLA ka Congress.
