Shillong, Nailar 16: U Myntri Rangbah ka Jylla Conrad K. Sangma hynne ka sngi Thohdieng ula pynpaw ia ka jingsngewsih kaba khraw, halor ka jingkhlad noh jong u Myntri Rangbah barim ka jylla u Salseng C Marak, uba la khlad noh hynne ka sngi ha Tura Civil Hospital na ka daw jong ka jingban ka jingpang hapdeng ka jingnoh ka rta.
U Conrad ula ong, ba ka kyrteng jong u Salseng C Marak ka dei kaba pawnam ha man la ki longing ha kaba iadei bad ka kam sain pyrthei ha rilum Garo bad u dei u nongialam uba la ioh bha ia ka burom bad ki nongialam ha ka kam saiñ pyrthei ki burom bha ia une u nongialam uba la khlad noh.
U Salseng Marak ula long u Myntri Rangbah ha ka por ba ka jylla ka dang mad ia ka jingbym don ia ka jingskhem ne jingneh slem jong ki sorkar ha ki snem 1990 ha ba ki sengriewlum kila long ki seng kiba don ia ka bor ban thaw bad ban pynkhyllem ia ki sorkar.
U Conrad ula ong, ba wat hapdeng ki por kiba jynjar, u Salseng C Marak ula bat ia ka shuki Myntri Rangbah naduh u snem 1993 haduh 1998 bad ula long u nongialam uba nyngkong eh ban shakri san snem pura khlem da phet ne kylla noh na ka seng Congress kaba u don.
“Ha ka rukom treikam ka saiñ hima sima kaba ju don ka jingbamsap bad ka jingbym treikam bha, u SC Marak ula long u nongialam sain pyrthei uba la pynneh ïa ka jinglong hok ka jongu da kaba ïaleh pyrshah ïa ki jingeh bad ia ki jingtynjuh kiba u iakynduh bad ula ioh ruh ia ka nam kum u briew uba khuid ne ‘Mr Clean’ uba la trei borbah ban lait na ka jingbamsap bad ban pynlong ia ka Meghalaya kaba kiew irat” ong u Conrad haka kyrwoh khubor.
U Salseng C Marak kum u Myntri Rangbah ula ialam ia ka sorkar bad ia ka jylla kum u nongialam uba khlain bad ka jingstad ka jongu ha ka kam sain pyrthei bad wat hadien ba ula shongthait noh na ka kam sain pyrthei ula iai bteng ban trei shitom bad ula sam ruh ia ka jingnang jingstad ka jongu bad ka imlang sahlang baroh kawei, la bynrap u Conrad Sangma.
U Myntri Rangbah ula ong, ba u Salseng Marak ula mihkhmat kum u MLA ka Resubelpara Constituency kaba don ha North Garo Hills naduh ki snem 1970 haduh u snem 2008 bad ula ioh ban mihkhmat biang ha u snem 2013 bad kum u MLA ka Resubelpara, ula trei borbah bad trei met bad mynsiem ban kyntiew ia ka constituency baroh kawei.
U Salseng Marak ula long ruh kum u President ka Meghalaya Pradesh Congress Committee (MPCC) ha u snem 2003 bad ula neh beit ia ka seng Congress haduh kaba kut.
Kumjuh ruh ka Forum of Ex-MLA ka Iingdorbar Thaw Ain ka Jylla, kala phah ia ka jingsngewlem halor ka jingkhlad noh jong u Salseng C Marak.
