Shillong, Jylliew: Saw ngut ki briew kila iap bad bun ngut kila mynsaw na ka jingtwa khyndew kaba ja ha artylli ki jaka ka Ri-lum Garo ha ka step sngi palei, kaba la jia hadien ka jinghap u slap ba neh la bun sngi hapoh ka thain.
U Myntri Rangbah ka Jylla Conrad Kongkal Sangma ula rai ban leit hiar hi dalade sha Ri-lum Garo ban peit thuh ia ka jinglong jingman na ka jingshlei um ha kiba bun ki jaka ka thain bad ban khmih ia ki lad ai jingiarap ia ki lanot kiba shah ktah.
Lai ngut na kajuh ka longing ba kynthup ia ka Kmie bad arngut ki Khun kila iap na ka jingtwa khyndew ha ka shnong Jewalgre, kaba hap hapoh ka Gambegre Block, West Garo Hills District, ong ki Pulit. Kine kiba iap ki dei kiba la tip kyrteng ka Pritish Ch Marak ba 38 snem bad ki khun.
Ha kawei pat ka jingjia, iwei I Khunlung ba dang 2 snem ka rta ila iap hadien ba ka iing kala shah pynjulor ha ka khyndew kaba twa. Kane ka jingjia kala jia ha ka shnong Samati, South Garo Hills myn ha ka step sngi palei.
Ka thain Ampati kala shah ktah jur bha ha ka jingshlei um bad bun ki ing ki sem kila julor na ka jingwan rung ka umsaw sha ki iing ki sem. Haduh 26 tylli ki shnong jong ka South West Garo Hills kila shah ktah ha kane ka jingslei um bad haduh 890 ngut ki briew kila hap ban phet nala ki jongki Iing sha ki jaka ba kynjang na ka jingkyntur jong ka um.
