Shillong, Aug 11: Ka University of Science Technology Meghalaya (USTM) ka la kyntait ia ki jingkynnoh ba ki jingtei kiba dang iaid shakhmat hapoh ka campus jong ka, ki dei ka daw bah jong ka jingshlei um ba dang shen ha Guwahati.
Haba pynshai hynne ka Sngi U Blei, ki heh ka USTM ki la ong ba u CM ka Assam Himanta Biswa Sarma ula shu ‘Kynnoh bakla” ba ka jingshlei um ha Guwahati ka dei namar ki jingtei ha ka jaka pule jong ka USTM. Ka USTM ka don ha Baridua, Jorabat ha Ri-Bhoi District jong ka Jylla Meghalaya.
Ka kyrwoh ka ong ba hadien “ka jingtohkit kaba bniah da ki riew shemphang jong ka tnad bad ki bor pyniaid”, ym shym la lap eiei ban pynshisha ba ka jaka pule jong ka USTM ka dei kaba la wanrah ia ka jingshlei um ha Guwahati.
Ka la ong ba ka jaka pule jong ka USTM ka noh synniang “lehse ia ka bynta kaba rit eh jong ka um kaba tuid shapoh ka surok Killing lyngba ki nala bapher bapher sha ka surok G. S. ha baroh arliang jong ka surok”.
U Myntri Rangbah ka Assam Himanta Biswa Sarma dang shen, u la kam ba katei ka University ka la pynlong ia ka “flood jihad” bad ka wanrah ïa ka jingeh ha ka jingtuid um ha ka nongbah Guwahati.
“Nga tharai ba u trai jong ka USTM (Mahbubul Hoque) u la sdang ïa ka Jihad. Ngi iakren shaphang ka Jihad khyndew, u la sdang ia ka jihad umsaw pyrshah ia ka Assam. Lym kumta, ym don ba lah ban pom lum ha kum kane ka rukom kaba khlem jingsngewsynei,” u Sarma u la ong.
U CM ka Assam u la bynrap shuh shuh ba uno uno uba ieit ia ka mariang un ym pynleit jingmut ha kum kane ka jingpynjot kaba jur ia ka mariang, khamtam ia ka jaka pule. “Ki (USTM) ki lah ban khot ia u nongshna jingtei bad shna ia ka jingtei wat haba ki dang bat ia ki lum bad ki dieng ki siej. Ki lah ban shna ia ki jingtuid um… Kim shym la pyndonkam ia uno uno u nongshna jingshna. Tang da kaba pyndonkam da ki bulldozer, khlem sangeh ki la pom ia ka khyndew”, ong u CM ka Assam.
Halor kane, ka USTM kala ong ba ka project jong ka, kaba dei ka medical college ba dang shna ryngkat bad ka sorkar Meghalaya, la khmih da ka M/s HOSMAC India Pvt kaba don ha Mumbai, bad ka M/s Satsangi Associates, New Delhi kiba dei ki nongai jingmut ban pynwandur ia ka.
La pyntip ba ïa ka plan bad ka jingpynwandur ïa kane ka projek la bishar bniah ruh da ki riewshemphang na ka Indian Institute of Technology (IIT) bad na ka National Institute of Technology (NIT). Kala pyntip ruh ba ia ka jingpynheh ïa ki jingtei jong ka Campus ki dei kiba la ioh jingbit na ka sorkar Meghalaya.
 ka la kyntait ia ki jingkynnoh ba ki jingtei kiba dang iaid shakhmat hapoh ka campus jong ka, ki dei ka daw bah jong ka jingshlei um ba dang shen ha Guwahati.){kind=link}