Shillong, Nailar 11: Hadien ka jingiaid ki hamsaia bad ki jingantad daki bnai ba mano ban long u/ka kyrtong ka NPP ha ka elekshon shiteng samoi ha Gambegre, u National President ka NPP bad Myntri Rangbah ka Jylla Conrad K Sangma, ula pynkut syndon ia kine ki hamsaia da kaba pynbna paidbah ia ka kyrteng ka Kurim, Mehtab Chandee A Sangma, kum ka kyrtong jong ka party.
Ula pynba ia kane ha ka jingialang paidbah ba long ha ka sngi Saitjain. Ula pyntip ruh ba ka rai ban pynieng iala ka kurim ka dei kaba la pynshong nongrim na ki jingdawa ki paidbah ia ka Mehtab Chandee ban long ka kyrtong ka Gambegre.
“Kam(Mehtab) pat ju don ha ka kam sain pyrthei. Wat hadien ka jingshong kurim jong ngi, ka ju kiar beit ialade na ki kam sain pyrthei. Hynrei mynta, ki paidbah ka Gambegre kila dawa ba ki kwah ia ka kan long ka Nongmihkhmat ki paidbah” ula batai.
Ka shuki MLA Gambegre kala lait thylli hadien ba u MLA Saleng A Sangma, ula jop ia ka elekshon MP Lok Sabha 2024 na Tura Constituency.
Ha kajuh ka por, u Conrad ula kular ia shibun ki kam pynroi ia ka Gambegre lada ka kurim jong u, ka shah jied. Lyngba ka Kurim, u ong, ki paidbah ka constituency kin ioh ruh ia ka lad ban iakynduh beit beit ia u.
“Lada shah jied, ka MLA jong ngi kan iakynduh man ka sngi iau Myntri Rangbah ka Jylla ban khmih ia ki jingeh jong ka constituency bad ka ong kaba kongsan namar ki don shibun ki kam pynroi kiba ka Gambegre ka donkam” ong u Conrad.
Ka NPP ka don 28 ngut ki MLA ha ka Iingdorbar ba 60 ngut. Kala jop 26 seat ha ka eleskhon 2023 bad ha ki kut taiew jong u bnai Jymmang 2023, ki 2 ngut ki MLA ka People’s Democratic Front (PDF) kila wan ban iasoh, kaba nang pynkhlain ia ka jingdon MLA ka party sha ka 28 ngut. Lad aka Mehtab Chandee A Sangma ka jop na Gambegre, kaba la bat da u Saleng haduh lai samoi, kan nang pynkhlain shuh shuh ia ka NPP ba kan bat ia ka synshar khadar ha kine ki 4 snem ban wan.
Ka elekshon ha Gambegre kan dei kaba jur bha ka jingiakhun bad baroh ki seng sain pyrthei kynthup ka Congress, TMC bad BJP kila khohreh bha ban ioh knieh ia kane ka seat.
