Shillong, Nailar 09: U Myntri ka tnad Social Welfare Bah Paul Lyngdoh ryngkat bad u Nongialam ka Liang Pyrshah ka iing dorbar thawain ka jylla Bah RV Lyngdoh hynne ka sngi Thohdieng, kila plie ia ka Half Way Home Rehabilitation of Persons Living with Mental Illness kaba don ha Saw Mer, Dong Pynthor Upper Shillong bad ia ka kali kit nongpang ne Ambulance.
Ha kane ka jingialang la iadonlang ka Deputy Commissioner ka East Khasi Hills ka Kong RM Kurbah, ka Director jongka ka Social Welfare ka Kong CD Lyngwa, ki nongialam shnong, ki nongialam ka KSU bad kiwei kiwei.
Ka Half Way Home kadei ka jaka sah jong ki Kynthei kiba don jingpang ha ka bor pyrkhat pyrdain. Ia mynta, ki don 25 ngut kiba sah ha kane ka jaka ban ioh iaka jingsumar bad kine kidei kiba wan n kylleng ka ri India. Ia kine ki briew la sumar ha kane ka jaka bad hadien ba kila koit la khiah, kila ioh ban leit phai noh sha ki iing ki sem ki jongki.
Haba ai jingkren, u Bah Paul Lyngdoh ula iaroh iaka jingtrei shitom jong ki Ophisar bad ki Nongtrei ka tnad Social Welfare ha ka jingshakri na ka bynta ka bha ka miat jong iaka imlang sahlang bad ula pan ruh iaka jingkyrshan bad jingiatreilang na baroh.
Ula ong ba ka long lypa kaba eh ban iatrei bad ki briew kiba biang nadong shadong kumta kan long kaba kham eh shuh shuh pat ban iatrei khamtam bad ki briew kiba don jingduna ha ka bor pyrkhat pyrdain.
U Bah Paul ula pynpaw ia ka jingkmen ba ka tnad sorkar kala trei bha hynrei u pdiang pat ban ioh ia kino kino ki jingkynthoh kiba kdew ia ki jingduna khnang ban lah ban pynbeit noh ia ki.
Na ka liang u Bah RV Lyngdoh ula iaroh iaka jingshimkhia jong ka Tnad Social Welfare hapoh ka jingialm u Bah Paul Lyngdoh bad ula ai ka jingiaroh ia baroh ki nongpeit nongsumar ia kine ki nongpang ha ka bor pyrkhat namar ka kam kaba ki trei ka long kaba khraw bha bad u ngeit skhem ba u Blei yn sa ai khusnam iaka jingtrei shitom ka jongki.
