Shillong, Naitung 07: Ki Nongshong shnong ka Pyrdiwah kaba don ha khappud India- Bangladesh ,ki la pynpaw ba haduh mynta kim don satia ia kano kano ka jingsyier na ka jingwan rung beaiñ ki nong Bangladesh, namar na sha shiliang u pud ruh ki don ki khasi kiba ia ithuh ithaw bha.
U Rangbah Shnong ka Pyrdiwah, u Bah Ambrose Khonglah u la ong ba ka shnong ka kloi ban ai jaka rieh ia ki Khasi-Pnar kiba dei na Bangladesh lada ki donkam jingïarap lane don kano kano ka jingjia.
Hadien ba la mih ka jingiakynad kaba jur ha ri Bangladesh ka Sorkar India ka la pynkhlaiñ ia ki bor pahara ha ki khappud bad ka Bangladesh lyngba BSF bad shipai, hynrei kumba ka long haduh mynta kam shym don kano kano ka jingma na ka jingrung beaiñ ki briew na Bangladesh.
U Bah Khonglah u la ong ba kam don kano kano ka jingsyier ia ki nongshong shnong, hynrei na ka liang ka shnong ruh ka long kaba la pynkhreh ban iada, da kaba peitngor lyngba ki Village Defence Party (VDP). Shuh shuh u la ong ba na ka liang ka shnong ka kloi ban iatrei lang bad ko BSF lada don kano kano kaba lah ban wanrah jingma.
Haba kren bad kawei ka longkmie ka la ong ba ia mynta kam don kano kano ka jingsyier kum ki nongshong shnong, hynrei tang ha ka por mynmiet ba ki don ka jingsheptieng ioh wan rung ki nong Bangladesh ban tuh ia ki mar ki mata bad ki jingdon jingem.
Haba leit jngoh ia ki katto katne ki jaka ha khappud ryngkat bad u MLA ka BJP na South Shillong u Bah Sanbor Shullai, la lap ba ki nongshong shnong ki don hapdeng ka jingshngaiñ bad kila iatrei iala ki kam kumba ju long. La iohi ruh ba ki paidbah ki don ka jingiadei kaba bha bad ki BSF ha katei ka thaiñ khappud bad ki khynnah ki mih ban ialehkai hala ka shnong da ka jingkmen.
