Shillong, Nailar 06: Watla ka jingkulmar ka dang iai bteng hapoh ka ri Bangladesh kaba pynbor ia ka Myntri Rangbahduh ka Sheikh Hasina ban phet krad na ka ri, ka jingkhmih lynti ka long ba baroh ki jaka khappud bad ka Ri Bangladesh kin dei ki jaka ba don hapdeng ka jingsyier bha bad kiba lah ban shah prong jubor ha kano kano ka por ha ki briew kiba phetwir na katei ka Ri ban wad jaka rieh.
Pynban kaei kaba jia ha Dawki-kaba don markhap bad ka Bangladesh, kala pynkyndit shikatdei eh haba iohi ba kane ka shnong khappud ka dang shing shngain bha kumba ju long bad ki trai shnong ruh kim ipatiaw ia ki jingjia ha Bangladesh bad ki dang iai bteng beit ban trei iala ki jong ki kam ki jam ba ju leh man ka sngi.
Hadien ka jingsaphriang ka video ba pyni ia ka jingkiew ki lieng ba kot da ki spah tylli sha wah Umngot, ka Shlem kala hiar ban jngoh dalade ia ka jinglong jingman ha Dawki bad shem ba kaei kaba la pynsaphriang ha ki rynsan social media ka dei tang ka jingmutdur ba khlem da pynshisha ia kane ka jingwan rung.
Haba iakren bad u Rangbah Shnong ka Dawki Bah Mankhraw Ryngksai ula kyntait ia ka jingkam ha kane ka video ba wan kiew da ki spah tylli ki lieng na Bangladesh bad ong ba haduh mynta kam pat don satia kano kano ka jingwan rung tuh jong ki nong Bangladesh hapoh ka thain.
Ula iathuh ba ha ka khyllipmat ba ka sorkar Bangladesh kala khyllem, ki lieng ki la wan poi mar dor sha ka Wah Piyan (ka liang jong ka wah Umngot jong ka Bangladesh) ban lum ia ki maw na katei ka wah bad kane ka jingwan lum ka jongki ia ki maw ka dei ka jingiohlad hadien 5 snem ba ka sorkar Bangladesh kala khang ban tih ne lum ia ki maw na katei ka wah naduh u snem 2019.
Ha ka sngi Baar, ka Shlem kala sakhi ba ki nong Bangladesh kila bteng iaka jingkhlong bad jinglum ia ki maw na ka wah kaba don shilliang abd ka Wah Umngot bad kam shym la don pat kano kano ka jingwna khlong ne tam ia ki maw kiba don ha ki bynta jong ka ri India.
U Bah Ryngksai ula bynrap ruh ba ka Dorbar Shnong ka shaniah pura ha ki shipai Border Security Force (BSF) bad ha ka sorkar bad ula pynpaw ba ka Dorbar Shnong ka shimkhia bha ban peitngor ïa kino kino ki jingthmu jong ki Nong Bangladesh ban wan rungtuh shapoh ka ri India bad ka shnong kala long ruh kaba la pynkhreh ban iada ialade.
Haba pynpaw ia ka jingsngewkhia, ula ong ba ka jingtih maw kaba la sdang biang hadien ba la khang san snem kan ktah jur ia ia ka ri India bad Bangladesh ha ki bnai tlang namar ka um kan sa hiar kynsan.
Kane ka jingwan tur ki nong Bangladesh sha ka wah ban lum ia ki maw kadei ka jingiohlad ka jongki namar ba ym shim la iohi ban don kino kino ki shipai jong ka ri Bangladesh ban pahara ha ki thaiñ khappud.
Uwei pat u nongshong shnong ula ong ba ka jingkhlong bad jinglum maw ki nong Bangladesh, ka paw kum ka jingleh kaba la khein thik pa thik hynrei ula pynthikna pat ba kam shym la don kano kano ka jingioh rungtuh jong ki nong Bangladesh shapoh ka ri India.
Haba kylli hato kila don ki Khasi kiba sah ha Bangladesh kiba la wan phet ban wad jaka rieh namar ka jingkynad ha katei ka ri, kane ka longkmie kala ong, “Ma nga ryngkat bad ka Dorbar Shnong ngin pdiang sngewbha ïa ki khlem artatien hynrei ka pynpaw pat ba kin ym ailad satia ïa ki heh paid ka ri Bangladesh ban wan rung”.
Kala ong namar ka kynrum kynram hapoh ka ri Bangladesh kumta kan don beit ka jingpyrshang ban rung tuh shapoh ka ri India kamtam eh na ki Rohingya bad ki paidbah kiba sah ha khappud ki don iaka jingsheptieng hynrei ki sngewshngain pat namar ba ki shipai kila bun ha ki thain khappud kiban ai jingiada ia ki.
Watla ka sorkar jylla kala pynjari iaka Korphiw Miet hynrei ka jinglong jingman ha ki thain khappud ha ki bynta jong ka Dawki ka long shngain ha kaba ka iew ka hat ka dang plie bad ki paidbah ki iaid ki ieng da ka jingshngain.
Dang ha ka sngi Nyngkong u Symbud Myntri Rangbah ka jylla u Bah Prestone Tynsong ula pynbna ba ka sorkar jylla kala rai ban pynjari da ka Korphiw ha shi lynter ka thain khappud bad ka ri Bangladesh kaba don 444 Km bad kane kan treikam naduh ka por 6 baje janmiet haduh 6 baje mynstep ha ki jaka kiba don hapoh jong ka 200 Metre na u Zero Line.
La sakhi ruh ba ki nongwan jngohkai ki dang wan jngoh ïa ka Integrated Check Post (ICP) ha Tamabil bad ki shipai BSF kila pynjur ia ka jingpahara bad kila peitngor bha ia katei ka jaka, hynrei na ka liang jong ka ri Bangladesh kala i kynjah bha.
Ki nongshong shnong, kila iathuh ba la pynlong ia ka jingiakhih kaba heh bha ha ka liang kaba hap ha ka ri Bangladesh, ha kaba ki paidbah kila rung beit sha ki ophis jong ka sorkar Bangladesh, hynrei ym shym la don pat kano kano ka jingjia ba kin wan rung tuh sha ka ri India.
