Guwahati, Nailar 06 : Ka kynhun Hindu-Kutumba Surakshya Parishad (KSP) ha ka sngi Ba-ar, kala byrngem ban pynlong da ka jingpakhang surok pyrshah ia ka Meghalaya ban pynpaw ia ka jingpyr shah halor ka jingkhang ia ki riewngeit Hindu ba kin leit lehniam bad duwai ha krem Mawjymbuin, Mawsynram.
Ha ka taiew bala dep, ka Dorbar Shnong Mawsynram kala rai ban nym ailad ia ki riewngeit Hindu ba kin wan lehniam hapoh ka Krem, kaba la bna nam namar ka jingwan dur ki maw ha ka rukom kaba ki riew ngeit Hindu ki ngeit ba dei ka dak u “Shiva”.
Haba kren sha ki lad pathai khubor ha Guwahati Press Club ha ka sngi Ba-ar, u President ka KSP Satya Ranjan Borah ula ong “Ngi donkam ia ka jubab na ki bor khmih ka Jylla Meghalaya, lem kumta, ka Sorkar Meghalaya kan mad ia ka jingiakhih hangne ha Assam, lehse kaba lah ban dei ka jingpakhang ia ka surok sha Meghalaya lyngba ka Jorabat (Guwahati), Paikan (Goalpara) bad kiwei kiwei ki surok”.
“Ngi dang shu pynsngew ia kaei kaba ngin leh pyrshah ia ka jinglong pyrshah ia ki Hindu. Lada ngi sdang ban leh eiei, kin ym ioh por satia wat ban khohreh” ong u Borah.
U Borah ula ong ba ka Ophis u Myntri Rangbah Duh ka Ri India bad ka Ophis u Secretary General ka United Nation, ki dei ban kylli ia u Myntri Rangbah ka Meghalaya ban pynshai ia ka nongrim jong ka Sorkar Jylla.
“Ngi kyntu ia ka Sorkar Meghalaya ban weng noh mardor ia kane ka jingkhang bad ki dei ban da pynbeit bha ia ka jingwan mane ia u Shiv Ling da ki paid Hindu ban rakhe ia u bnai ba kyrpang bala tip kum ka Shraban” ula bynrap.
U Borah ula ong “Ka krem Mawjymbuim ka don ia u maw ba wandur kum u Shiv Ling bad ka dei ka jaka mane bad ka Sadhana ki Hindu k aim ha Meghalaya. Bun bha ki riewniam Hindu ki ju leit sha kane ka jaka ban leh niam manla u snem khamtam ha u bnai ka Shravan”.
Une u Nongialam ka seng Hindu ula buh jingkylli ruh “La iohi ba bun bha ki briew kiba dei ki paid Khristan bad katto katne ki Sengbhalang jong ka Jylla ba synshar da ki Missionary Khristan, kila khnang ia ki riewngeit Hindu ban leit mane Blei hangtei. Hato kane ka dei ka kamkai”.
