Ther u CM ka Assam ia ka Sorkar WB bad Jharkhand ba ailad ia ka jingrung ki Rohingya

Guwahati, Naitung 31: U Myntri Rangbah ka jylla Assam u Himanta Biswa Sarma hynne ka sngi u la kynthoh jur ia ka Sorkar Jylla West Bengal bad Jharkhand halor ka jingshim ia ka nongrim kaba jynsur palat ia ka jingwan buhai shnong ki Jaidbynriew Rohingya.

Haba ai jingkren ha ka jingialang bad ki nongthohkhubor ha Guwahati, u Himanta ula ong, “Ka sorkar West Bengal bad Jharkhand ka la long kaba jemnud halor ka jingwan buhai shnong ki Rohingya. Ki Rohingya ki dang pyndonkam ia ka jinglong jingman ha khappud jong ka India bad ka Bangladesh namar ba ki jaka kiba heh ki long kiba jylliew. Ha Assam ngi la pynkhlain iaka jingpahara hynrei ka Assam ka dei tang ka bynta jong u pud u sam jong ka India-Bangladesh,”.

“Dang shen ki pulit ka Tripura ki la kem bun bah ki Rohingya. Ka jingrung ki Rohingya sha India ka kiew bun shah. Ha u snem ba la dep, ki pulit Assam ki la pynpra ia kawei ka network bad hadien ka NIA ka la tohkit ia ka. Ka sorkar pdeng ka dei ban shim ia ka mat jong ki Rohingya bad ka sorkar West Bengal” la ong.

U Himanta ula bynrap shuh shuh daka ba ong, “U Myntri Rangbah ka West Bengal u la shim ia ka nongrim kaba jem ban pyrshah ia ka ishu bad ka jingwan buhai shnong jong ki Rohingya bad ka jingbun briew ka la nang kylla,”.

“Ki jingkylla ha ka jingbun briew kiba jia ki ban ai ia ka khubor kaba sngewsih. Namar ki polisi pynsngewbha ngim lah ban tehlakam ia ka. Ka ri baroh kawei ka mad jingeh namar kane ka mat,” u la ong.

U Himanta ula ong, “Ka jinglong jingman ka long kaba shyrkhei. Phim ju ap ia ka jingkhein briew tang ban iohi ia ka List jong ki nongthep vote 2024 bad ka list jong ki nongthep vote 2019 ia ka jingkylla ha ka jingbun briew. Ka Assam kam dei shuh ka jaka rieh ia ki nongwan buhai shnong beain namar hadien ba ka BJP ka la wan ha ka bor ngi la shim khia halor kane. Hynrei ka Bengal bad ka Jharkhand ki sngap jar halor ka mat kaba khia,”.

“Ka polisi kaba jem pyrshah ia ka jingwan rung tuh jong ki Rohingay kam treikam. Lada ngim khanglad ia ka, ka ri baroh kawei kan iakynduh ia ka jingshah thombor ha ka liang ka jingbun briew,” ula ong.