Pynrem jur ki Seng kam jngohkai ia ka HNYF ba khang iaki Nongshangkai ban leit Sohra bad Dawki

Duhnong haduh 30% na ki jingwai jaka sah, sa 50% kin pep wankai naduh lashai

Shillong, Naitung 26: Ki Seng ba trei ia ki kam jngohkai ha Meghalaya hynne ka sngi Thohdieng, kila pynrem jur ia ka seng Hynniewtrep National Youth Front (HNYF) halor ka jingkhang bad pynphai ia baroh ki nongshangkai pyrthei kiba thmu ban leit shangkai sha ki jaka bapher bapher kiba don ha Sohra bad thain Dawki.

Lah ioh jingtip ba naduh ka por mynstep jong ka 26 tarik Naitung, ki dkhot ka HNYF kila bat bad pynphai lut ia baroh ki kali Tourist kiba wan na shabar ka Jylla ha Umtyngngar, East Khasi Hills.

Kine ki seng ki kyntup ia ka Tourism Operators Association of Meghalaya (TOAM), Federation Shillong Hotels (FSH), Meghalaya Rural Tourism Forum (MRTF), Tour Guide Operator Association of Meghalaya (TOAM), Meghalaya Tourist Development Forum (MTDF), Tour Guide Association of Meghalaya (TGAM) bad kiwei kiwei.

Haba iakren bad ki lad pathai khubor, u President ka TOAM Bah Banlum Blah ula ong ba ka seng kan sa thoh sha u Myntri ka tnad jngohkai ban batai halor kane ka jingjia ba sngewsih bad ban dawa ban leh eiei da kaba tyngeh ia ki briew kiba pyrshang ban pynsniew iaka karkhana jngohkai hapoh ka Jylla.

U Bah Blah u pyntip ba namar kane ka jingjia, ki seng ba trei ia ki kam jngohkai ha Meghalaya, kila khot ia ki jingia lang ba kyrkieh ban iakren ia kane ka jingjia.

“Ka long kaba kyndit ym tang ia ki nongshangkai hynrei ka jingkyndit ba khraw eh ka dei ia ngi namar ha ka sien ba nyngkong ngi la iohsngew ba ki nongshangkai kila shah pynsangeh bad shah pynphai shala ki jong ki jaka ba ki wan” ong u ah Blah.

Ula kam ba ka shimpor da ki snem ia ki kynhun ba trei ia ki kam jngohkai ha Meghalaya ban kyntiew ia ka kam jngohkai bad ban khring ia ki nongshangkai pyrthei kumba long mynta hynrei kine baroh kila long lehnohei noh tang ha ka shikhillipmat.

Ula bynrap ba ki kam jngohkai ka dei kawei na ka nongaikam ba bun eh ha Meghalaya bad kaba pynmyntoi da ki spah ngut ki samla khamtam mynta ba ki kam jngohkai kila rung sha ki kyndong kynshrot jong ka Jylla.

“Katto katne snem mynshuwa, ngi hap ban khroh ia ki nongshangkai pyrthei ba kin wan sha Meghalaya. Ngi hap ban ong ia ki sngewbha bad pynkohnguh ia ki ba kin wan sha Jylla watla ki jingtei bad ki jingdonkam jong ki nong shangkai kim dei kiba la biang” ula bynrap.

Kine ki Kynhun kila pyntip ba namar kane ka jingjia hynne ka sngi, haduh 30% ka jingduhnong kala wanrah na ka jingwai ia ki jaka sah bad kiwei kiwei. Kala khmih lynti ruh ba sa 50% ki nongshangkai kin sa pep noh ban wan kai sha Jylla naduh lashai ka sngi namar ka khubor jong kane ka jingjia kala pur sted ha kylleng ka Ri.

“Na baroh ki seng ba trei ia ki kam jngohkai ha Meghalaya, ngi kwah ban panmap sha baroh ki nongshangkai kiba la shah ktah hynne ka sngi. Ngi kyrpad ruh ia baroh ki nongshangkai ba kin wan biang sha Meghalaya bad ba kumkine ki jingjia kin nym jia shuh” ula bynrap.