Agartala, Nailar 13 :U nongialam liang pyrshah ha Tripura, u Manik Sarkar hynne ka sngi Saitjain u la kynthoh tyngeh ia ka sorkar synshar BJP bad kam ba ka synshar paidbah ka don hapdeng ka jingsyier naduh ba ka saffron party (BJP) ka la wan ha ka bor synshar.
Ha ba kren ha ka rally halor ka phang “save education” ia ka ba la khot pynlong da ka Students Federation of India, ka ba dei ka tnat ki samla pule jong ka liang pyrshah CPI-M, u Sarkar u la ong; “Ia ki hok jong ki paidbah la lute noh ha ka por mynsngi mynshai.Ki riti synshar ri (constitution) jong ka India ki ai ha ngi ia ki hok ba ngin jied laitluid.”
Hynrei u la ong ba ka sorkar synshar BJP ha ryngkat ki kynhun bymman jong ka ki la pyndonkam bakla ia ka bor bad ia ka pisa ka ba la pynjot thiaw ia ka riti synshar khadar ka jong ngi.Lada ngim ioh ia ka hok ban thep vote, kumno kata ka jinglaitluid kan long ka ba shisha.?
Ha ba pynshai ia ka jingsngew ka jong u halor ki jingtreikam jong ka parliament bad ka jingpynlong ia ki ilekshon, u Sarkar u la ong; “Ka ilekshon ka dei ka bynta ka ba kongsan tam ha kino kino ki ri synshar paidbah.Hangne ngi shim ba ka bynta jong ki party synshar bad ki party liang pyrshah ki long ki ba kongsan ha ka jingialeh ha ka madan ialehkai.Hynrei, kane ka rukom treikam ka la jah rngai noh hadien ba ka BJP ka la wan ha ka bor synshar.Baroh ki ilekshon ha ka jylla bad hapoh ka ri ki la shah pynkylla long kamkai lut.
“Ka BJP ka ba la banbor namar ka jingbun paid ka jong ki hapoh parliament ka la mynjur 10 haduh 15 tylli ki Bill ha ka shi sngi.Ki jingiamir jingmut halor ki kam thaw ain ki la pulom noh katba nang iaid ki sngi ki por.Yn ym don ba lah ban thaw ia ka ain ka ba paka tang marwei hi.Baroh ki donkam ia ka jingiamir jingmut lang bad ban khmih na ki jinglong jingman.Hynrei kine kim shym la salia ban pynsngap ia ki jingai jingmut jong ki liang pyrshah ka ba long ka jingma ka ba khraw,” ong shuh shuh utei u CM barim ka Tripura.
Ha ka juh ka por u Sarkar u la kyrpad ruh ia ki samla bad ki khynnah pule ba kin shim ia ka bynta ka ba kongsan ban iakhun pyrshah ia ki kam sain hima ki ba pyniapait iapra jong ka BJP.
