Nongpoh, Naitung 24: Ka seng Hynniewtrep Youth Council (HYC) bad Hynñiewtrep Integrated Territorial Organization- (HITO) Bhoirymbong Circle, ha ka sngi Balang, ki la leit buddien na u BDO ka Bhoirymbong C&RD Block, halor ka jingpyrshah ban shna Resort harud ka Wahduid Uminshi.
Ka wahduid Uminshi ka dei ka ba don ha khappud ka shnong Bhoirymbong Lumsohpieng bad ka Bhoirymbong Lumdaitkhla.
Kine ki artylli ki Seng ha ka 20 tarik Jymmang, kila leit jurup ia ka jingtei jong ka Resort harud kane ka wahduid hadien ka jing ujor ki paidbah ba kane ka Resort kan sa pynjot pynjakhlia ia kane ka wahduid. Kine ki Seng lem bad ki paidbah kila dawa ia u trai jong ka Resort ba u dei ban pynsangeh mardor ia ka resort.
Namar ka jingkynnoh leh bym suidniew jong u trai ka Resort, kine ki ar seng ha ka 24 tarik Jylliew, kila leit buh syndon da ka dorkhas sha ka Ophis u Deputy Commissioner ka Ri-Bhoi. La ong ba u DC ula kular ban phah leit jurip ha u Magistrate hynrei kane kam shym la urlong satia haduh mynta.
U President ka HYC-Bhoirymbong Tyngshain Makri ula pyntip ba u BDO ula kular ba ka Ophis kan sa shimkhia ia kane ka kam bad kan sa leit jurip ruh ha ka 26 tarik Naitung ha ryngkat ka jingthew jingwoh ban pynthikna la une u trai Resort u pynkhein ne em ia ki kyndon ain bad ki hukum ka Iingkashari Meghalaya High Court.
Ula pynpaw ba ki arseng bad ki paidbah kin iai pyrshah ia ka jingtei Resort harud kane ka wahduid namar kan sa wanrah ia ka jingduhnong ia ki paid nongshongshnong kiba ju pyndonkam ia katei ka wah ha ka sait ka khlieh bad ka sum ka sleh manla ka sngi.
Hadien kane ka jingiakynduh, kine ki artylli ki seng kila hiar jurip biang ia katei ka resort ha ka jingiadon ryngkat ki nongialam shnong ka Bhoirymbong Lumsohpieng bad ki paid nongshnongshnong
Hadien ka jingiakynduh ia u BDO, kitei Artylli ki Sengbhalang ki la leit pat ban jurip biang ia katei ka jaka ha ryngkat ka jingiadon lang ki paidbah Nongshong Shnong bad ki Nongialam Shnong jong ka Shnong Bhoirymbong Lumsohpieng.
