Shillong, Naitung 19 : U Myntri Rangbah ka Jylla Conrad K Sangma ha ka sngi Thohdieng, ula kular ba ka jingpynrung kyrteng ia ki nongbylla bar jylla kan iaid noh thik kat kum ka Ain haba ban jur ba ka Sorkar kan leh da kaba tyngeh ia kito kiba donkti ban pynkhein ia ka Ain da kaba pynlong ia ki jingkhynra kot khynra sla hapoh ka thain.
Haduh mynta, ki Pulit kila register haduh 10 tylli ki case pyrshah ia ki nongialam sengbhalang ba donkti ha kum kane ka kam.
Hadien ba dep iakynduh ia ki nongialam ka seng Khasi Students’ Union (KSU), u Conrad haba iakren bad ki nongthoh khubor, ula iathuh ba ka Sorkar Jylla kan sa bishar bha ia baroh ki jingtyrwa bad ki jingai jingmut bala pynsngew da ka KSU halor kane ka ishu.
“Ngin bishar ia ki jingtyrwa bad jingai jingmut bapher bapher ba kila ai bad ngin sa peit kumno ban jam shakhmat halor kine” ula ong.
Ka KSU kala pynjur ia ka jingkhynra bad talasi ia ki kot ki sla jong ki nongbylla bar jylla kum ka dak ban pynpaw ia ka jing pyrshah halor ka jingslem ban pyntreikam ia ka Inner Line Permit (ILP) bad ka Meghalaya Residents Safety and Security Act (MRSSA) ha Jylla.
U Myntri Rangbah u pyntip ba ha ka jingialang, ula batai ia ki Nongialam ka KSU halor ka Work Permit ba ju iakren na ka por sha ka por ba kam shym don ka kyndon ha ka ain haba phai sha ka work permit bad bynrap ba ka Sorkar kala kular ban pynthikna ia ka jingpynrung kyrteng ba khlem pep jong baroh ki nongbylla bar jylla kiba wan rung sha Jylla.
U Conrad ula pyntip ruh ba ki Nongialam ka KSU kila pynsngew ia kiba bun ki ishu bad jingsngewkhia halor ka jingpyntrei kam ia ki ain bapher bapher ha Jylla, kaba mut ki State Act bad ruh ki National Act. “Hooid ngi la buh jingthoh ia kane bad ha ka jingshisha haba ki shem ia kino kino ki jingduna, lada don ki jingbym biang hangne hangtai, lada ki shem, ki lah ban wan ujor sha ngi bad ngin sa shim ia ki sienjam ban pynbeit ia ki”.
“Kila don ruh ki jingai jingmut ba iadei bad ka State Act haba phai sha ki jingpynsajia kiba don ha ki kyndon ba kin long kiba kham pyrrkhong, ia kaba ngin sa shong bishar ia kine ki kam. Kila kren ruh halor ki jingpynshisha ia ki briew ba wan rung sha Jylla. Ngi la buh jingthoh ia kine ki jingai jingmut bad ngin sa shong bishar ia kaei kaba dei ban leh” ula ong.
Halor ka jingpynbna ka KSU ban pynjur ia ka jingtalasi ia ki kot ki sla tad haduh ba ka Sorkar kala wanrah ia ki ain ba pyrrkhing ia ka jingrung kyrthep ki mynder, u Myntri Rangbah ula ong ba mano mano ruh kim don bor ban leh ia kane. Kat kum ka jingong jong u, kila don 10 tylli ki case bala ujor pyrshah ia ki nongialam sengbhalang.
