Shillong, Naitung 19 : U Myntri Rangbah ka Jylla Conrad K Sangma ha ka sngi Thohdieng, u pyntip ba ki don sa kumba 36 ngut ki samla pule MBBS ka Jylla, kiba dang sahkut ha ri Bangladesh.
Kat kum ka jingiathuh jong u, kine ki samla ki dei kiba pule ha Eastern Medical College.
U Myntri Rangbah u pyntip ba palat 405 ngut ki samla na India ha kaba 80 ngut kiba dei na Meghalaya, kila wan phet na Bangladesh kaba don hapdeng ka huri hura kabba jur bha bad kine ki samla kila wan poi sha la iing lyngba ka Dawki, West Jaintia Hills.
U Conrad u pyntip ba ki dang don ruh ki samla pule na Bhutan bad na Nepal nalor ki nongshangkai pyrthei, kiba dang sahkut bad kiba la jam sha shiliang u pud na ka thain Dawki.
U pyntip ba ka Sorkar Jylla kala iakren khlem sangeh bad ka Indian Embassy ha Dhaka ba kin leit shaw bad wan on ia ki ba dang sahkut ha Bangladesh.
“Kila mih katto katne ki jingsngewkhia haba iadei bad ki samla pule MBBS ha Eastern Medical College. Ngi la iakren bad ka Indian Embassy bad watla ka College kala pyntip baka jinglong jingman ka dang biang hynreo, kiba bun ki Kmie Kpa kila khuslai bha” ong u Conrad.
“Namar kata, nga kwah ban pyntip sha baroh ki Kmie Kpa ba ngi dang bteng beit ia ka jingiakren, watla ka jinglong jing man hajan ka college ka dang biang, hynrei ka leit ka wan kam long shngain namar ka lah ban mih kaei re kaei ha lynti kumta kam long kaba biang ban buh ialade ha ka jingma. Tad hadien ba ngi thikna ba ka lynti iaid kala shngain, ngi lah ban leit shaw ia ki ban pynpoi sha khappud. Ngi kyrmen ba ha kine ki 24 kynta ban wan, ngin sa lah ban antad ia ka jinglong jingman”ula bynrap.
Haba pynpaw ba bun kiba wan phet kila rung na Tripura, u Myntri Rangbah ula ong “Ngi la iakren bad ka Sorkar Tripura ruh lem bad u High Commissioner jong ngi ha Bangladesh ruh. Ki Ophisar jong ngi kila iakren khlem thait khnang ban gin lah ban pynmih noh mardor ia ki samla pule jong ngi bad kiwei na katei ka Ri”.
Nalor kane, u CM ula pyntip ba ka Sorkar kala rai ban pynmih noh da ka Online portal ban ioh ia ki jingtip bad ki lad iakren jong baroh ki samla pule na Meghalaya, kiba pule shabar jong ka Ri. Kat kum ka jingong jong u, ka Sorkar kala mad ia shibun ki jingeh ha ki snem bala leit noh namar ba kam don ia ka lad iakren marmet bad ki samla pule ba pule shabar ka Ri.
U pyntip ba ia kane ka jingtyrwa yn sa rah iakren hapoh ka jingialang ban wan jong ka Kynhun Myntri ban ai ia ka jingmynjur.
