Shillong, Naitung 17 : Ka Bharatiya Janata Party (BJP)-Meghalaya, kala dawa ia ka Sorkar Pdeng ba kan ai jingithuh da ka Ri (National Recongnition) ia u Tirot Sing Syiem bad ai jaka lem ia u ha ki kynroh jong ka Iingdorbar Parliament da kaba buh ia ka dur jong une u Nongiakhun Laitluid.
Ka BJP-Meghalaya kala dawa ia kane haba rakhe ia ka lyngkhuh sngi iap ba 189 snem jong u Tirot Sing Syiem hynne ka sngi Balang, kaba la pynlong hapoh ka Ophis ka BJP.
U Vice President Bah Khrawbok Basaiawmoit, u dkhot ka National Council Bah David Kharsati bad u nongaiktien ka Jylla Bah Mariahom H Kharkrang, ki la ai jingkren ha kane ka jingialang halor ka jingim bad ka jingiakhun thma jong u Tirot Sing pyrshah ia ka Sorkar Bilat.
Nalor kane, ka Party kala pynkynmaw biang ia ka jingkyrpad kaba la slem na ka Tnad Postal ba kan pynmih ia ka stamp ban kynmaw burom ia u khla wait bad kyntu ia ka Ministry of Education ba kan kynthup lang ia ka khana jong u ha ka kot histori ki skul khnang ba ka jingaiti jong u ia ka jingim kan ai mynsiem ia ki pateng ban dang wan ha ka Jylla bad ha kylleng ka Ri.
Ka BJP-Meghalaya kala rakhe ia kane ka sngi da ki prokram bapher bapher bala pynlong hapoh ka Nongbah bad ha kylleng ki District ka Jylla.
Ka Mahila Morcha ka Jylla ba ialam da ka President Susuki Pariat bad ka kynhun ka BJYM ba ialam da u President Mebaker Lyngdoh, kila leit buh syntiew ha u motdur jong u Tirot Sing uba don ha State Central Library bad la pynbud pat da ka jingpynkhuid shnong ia ka Nongbah ban pynsaphriang ia ka khana shaphang une u nongiakhun laitluid ba khraw ka Ri-lum Khasi.
Ki Nongtrei ka BJP kila pynlong ruh ia ki prokram ha Nongkhlaw bad ha kiwei ki District ka Jylla.
