Nongpoh, Naitung 14 : Ka thain Umiam hajan jong ka Jingkieng Pulit, kaba don ruh ia ka jaka iaid kai ki nongshangkai pyrthei, kala kup mynta ia ka dur ba ijli bad isaidmet ban peit namar ka jingsatah jong ki jaboh jabain bad ki niut ki nier naduh ba ki bor Sorkar kila pynlong ia ka surok service road, kum ka jaka pynieng ki bos Night Super mynta la saw-san bnai.
Kane ka jingpynieng bos Night Super ha kane ka surok, kala sdang naduh ba ka Jylla kala tei pynkhlain bad maramot ia ka Damsite bad ka jingkieng Damsite-kaba la khang ia baroh ki kali heh ba kin iaid lyngba ka jingkieng kat haduh mynta mynne.
Ki bos Night Super kiba wan na ki thain Silchar, Assam kila hap ban pynhiar ia ki passenger hapoh ka Inter State Bus Terminal (ISBT), Mawiong katba kiba wan na Guwahati ki hap ban pynhiar ha ka Service Road ba don ha Jingkieng Pulit, Umiam.
Ka jingleh matlah jong ki bor Sorkar ban shimkhia ia ka khuid ka suba da kaba pynbiang ia ki jaka leit bar bad ki jaka bret niut ha kane ka service road, kala pynlong ia kane ka jaka kaba la ijli bad ba sma iwtung namar ka jingsatah ki jaboh jabain, ki painkhna bad ki jingleit bar jong ki nongniah bos bad kumjuh ruh jong ki paid nongleit nongwan ki bym don jaka ban phai shano shano ruh.
“Naduh ba phah pynieng bos ha kane ka jaka ha Umiam, ki nongleit jingleit kynthup naduh ki nongniah bos bad ki nongbud kila mad jingeh bha na ka jingbym don ka jaka leit bar. Dei kane kaba pynbor ia kine ki briew ba kin leit bar pathar kylleng ki jaka ba ki sngew shngain bad bret ruh ia ki jaboh jabain kat haba lap ba shem” ong ki katto katne ki ningniah bos bad ki paidbah nongleit nongwan.
U Rangbah Shnong ka Umiam bad Rangbah Dong ba kynthup ia u Bah Stevenson Kharkrang bad Bah Sidra Basaiawmoit, kila pyntip ba ka Dorbar Shnong na ka por sha ka por kala iai pynsngew sha ki bor khmih ia ka jingdonkam ban buh ia ki jaka leit bar bad ki jaka bret niut hynrei ym shym la don satia mano manor uh ba pynsngap haduh kine ki sngi.
“Ka Dorbar Shnong bad ka Tnad Tourism kila shimkhia shipor ban buh ia ki jaka leit bar paidbah kaba ki ong ka Removable Toilets ha kylleng ki jaka jngai jngai jong ka pung Umiam, hynrei namar ka jingiatakhuhbad ki kyndon ain ka Iingkashari Meghalaya High Court, ka Shnong kala hap ban weng noh” kila pyntip.
Kila iathuh ba dang shen ka Tnad Tourism bad ka Bor District ka Ri-Bhoi, kila dep ban sorjamin ia kawei patka jaka ban shna ia ka jaka leit bar bad jaka bret niut kaba thikna ha ka thain Umiam.
Halor ka jinglong jingman ha Jingkieng Pulit, ka Dorbar Shnong ka kyrpad ia ki bor khmih ban shimkhia ha kaban leh eiei noh mardor khnang ban lah ban wanrah ia ka jingkhuid jingsuba ha ka thain bad ki jaka rudnong jong ka pung umiam.
