Shillong, Naitung 12 : Ka Sorkar Jylla kala pynkut noh ia ka jingpyntreikam ia ka ‘Smart Road’ Project hadien ba shem bad ka jinglong jingman ki jaka ha Jylla.
Namar kata, ka Sorkar kala pynkhreh ia ka jingtyrwa thymmai ban siang rong bha noh ia baroh ki surok ba kongsan jong ka Nongbah ha ka jaka ban shna ia ki Smart Road.
Ka surok Smart Road, kaba la shu ieh khlem dep ha thain Lachumiere, ka dei kawei napdeng ki 17 tylli ki project Smart City bala pyntreikam hapoh ka Jylla.
“Ia ka phase-I jong ka smart road project la pynkut noh. Ngi la dep iashong jingialang ha ka jingiadonlang u Symbud Myntri Rangbah ba khmih ia ka Tnad PWD (Roads) bad ma nga namar ngi iakynduh ia shibun ki jingeh ban pyntreikam ia ka project. Kumta, ngi la pynkut noh. Tang 3-4 % ka kam ka dang iaid” ong u Symbud Myntri Rangbah ka Tnad Urban Affairs Bah Sniawbhalang Dhar haba iakren bad ki nongthoh khubor ha ka sngi Thohdieng.
“Namar kane, ngi la rai ban buh noh da ka mang tyngka ba thymmai na ka State Plan. Ngin pyrshang ban sieng rong biang ia baroh ki surok ka sor. Kin long kum ki smart road na ka State Plan lyngba ka Tnad PWD . Kumta ka jingpynkhreh ia ka DPR ka dang iaid shaid shaid mynta” ula ong.
Haba kylli, u Bah Sniawbha ula pyntip “Ngi la pynkut namar ba kam iahap bad kawei ruh ba um ioh jaka….Ki Ophisar kin hap ban shna ia ka financial bill ba khlem dep (namar kane ka rai). Kumta, ngi la rai ban siang rong thymmai ia baroh ki surok ba kongsan hapoh ka sor”. Kat kum ka jingong jong u, tang khyndiat eh ka pisa la pynlut ha kane ka smart road project kaba pulom.
Ha kajuh ka por, u Bah Sniawbha u pyntip ba dang shen ula lum ia ka jingialang bishar kam halor ka jingiaid jong baroh ki smart city project.
“Katto katne ki project yn sap lie noh ha u bnai Nailar bad Nailur. Kat kum ka jingtip bala phah, baroh ki project kila iaid bha. Nga tharai kan sa iarap bha ia ki briew, kum ka nuksa, ynda la dep ia ka Iew Polo, Iew Laitumkhrah, ICCC. Kumjuh ruh kumba 12-13 tylli ki parking lot ki dang iaid mynta ha ka jingpyntrei” ula ong.
Haba kylli la ka jingkhynra nongbylla bar jylla jong ki Sengbhalang kala ktah ne em ia ki project ka Tnad, u Bah Sniawbha ula ong “Ia mynta hi, ngam pat ioh jingtip. Lada don ka jingpynthut, khlem pep kan ktah hynrei nga kyrpang ia baroh ki paralok sengbhalang ban iatreilang bad ka Sorkar”.
