Goalpara, Naitung 12 : Ka bor district ka Goalpara, kala khang tala ia ka New Life Foundation Rehabilitation Centre kaba don ha Nayapara ha Sor Goalpara ha ka sngi Palei hadien ka jingkynnoh shah pyniap u Niksamseng Ch Marak, u samla na sor Tura, West Garo Hills District.
U Marak uba la kit da ki Pulit ha kane ka de-addication centre, ula shah pyniap ha ka 4 tarik Naitung.
U Shikhamani Borah, Assistant Commissioner ka Goalpara, bala synran da u Debajit Das, Officer-in-Charge ka Goalpara Sadar Police Station, Dr. Janabir Das, Health Officer bad Dr. Upamoy Nath, Physician, kila leit ban khang tala ia kane ka Rehab Centre.
U Niksamseng ula shah bat ha ki Pulit ha Assam ha ka 2 tarik Naitung hadien ka jingkhynra droks ha ka thain Krishnai jong ka District bad hadien ki Pulit kila phah ia u sha Rehab Centre, ia kaba tang hadien 2 sngi la lap ba ula iap ha ka rukom kaba ipher bha.
Ka kaiphod ba nyngkong na ka Rehab Centre ka kam ba u Marak ula dkhat jubor iala ka jingim hynrei na ka jingkhmih ia ka video CCTV, ki Pulit kila lap ba ki nongtrei bad ki briew ba shah set ha kane ka Centre kila shoh ia u Marak.
Ki Pulit kila haduhphra ngut ki briew halor ka jingshah pyniap u Marak. Kine ki kynthup ia u Supervisor jong ka Rehab Centre bad kiwei kiwei ki Nongtrei.
Haba shimkhia ia ki jingujor na ki seng bapher bapher, u Myntri Rangbah ka Jylla Conrad K Sangma ula kyntu ia u Myntri Rangbah ka Assam Himanta Biswa Sarma, ban pynlong jingtohkit ia kane ka jingjia bad pynthikna ba ka longiing u Marak kan ioh ia ka jingbishar kaba hok.
