Shillong Naitung 11: U Myntri Rangbah ka jylla Conrad K Sangma, hynne ka sngi palei, ula leit iashimbynta ha ka Impact Week 2024 ha Martin Luther Christian University, ka prokram ba la pynlong da ka Prime Meghalaya ryngkat ka jingiatreilang bad ka MLCU ban ai mynsiem ia ki samla bad ka lad ba kin jied ha kaban seng kam lajong kum ka jingangnud ha ka jingim ka jongki.
Ha katei ka jingialang la iadonlang u Commissioner & Secretary ka tnad ka pule puthi Vijay Mantri bad ki samla pule na kylleng ki College kiba kwah ban long ki nongsengkam lajong.
Haba kren ha ka jingialang u Conrad K Sangma, ula pynkynmaw iaki sngi kaba ula sengkam lajong hashwa ba yn rung ha ka kam saiñ pyrthei bad ula ong ba ka jingseng kam lajong kala wanrah ia ka jingkylla ha ka jingim ka jongu ha kitei ki por.
“Kumta haba ngi la wan sha ka bor synshar ha ka sorkar, nga la long uba la shai kdar bha ha ki jingmut jingpyrkhat ba ngin thaw ia kata ka rukom treikam kaba janai ia ki nongsengkam lajong ia kaba ngam shym la ioh ia kano kano ka lad ha ka por ka jong nga” ong u Conrad.
Ula ong ba ki katto kattne ki prokram jong ka sorkar jylla na ka bynta ki nongseng kam lajong kum ka Prime Meghalaya, CM Elevate, Chief Minister’s E Championship bad kiwei kiwei bad ula kyntu ia kiba la wan ha ka jingialang ba kin shimkabu ia kitei ki prokram.
U Conrad ula iaroh ruh ia ka jingpyninam ki samla pule ha katei ka jingialang bad ula ong, “Phi lah pyni ia kata ka kyrdan jong ka jingskhem jingmut halade bad iaka lynti kaba phi lah shim ha kaba iadei bad ki jingeh haka rep ka riang, ka kam jngohkai, ka leit ka wan, jingpyndonkam ia ki niut ki nier bad kiwei kiwei kiba long kongsan na ka bynta ki nongseng kam lajong ba kin ithuh bad ban thaw ia ki lad ki lynti ban weng ia kitei ki jingeh.
Ula ong ruh ba ka jingpynkylla ia ka rukom pyrkhat pyrdain ban peit ia kiei kieiym kum ki jingeh hynrei kum ki lad ki lynti kaba ki nongseng kam lajong kin shim ha kaban pynmih ia ki sienjam kiba lah ban pyntreikam bad kiba lah ban kot bot ha ka jinglut jingsep.
Ka Prime Meghalaya ha ka lynti iaid ka jongka ban kyntiew ia ki samla ban seng kam lajong, kala bei tyngka bad kyrshan ia ki 15 tylli ki jaka pule ha kylleng ka jylla ban pynlong ia ki Entrepreneurship Development Program bad ban pynmih ia ki nongseng kam lajong bad ia ki karkhana.
Ka Impact Week 2024 ka dei ka prokram kaba artaiew kaba la pynlong da ka E-Cell jongka MLCU ryngkat bad ka Prime Meghalaya bad la pynwandur ia ka Impact Week, ban kyntiew ban shna ia ki jingshna kiba thymmai bad ka jingseng kam lyngba ka jingwandur kyrpang.
La sdang da kaba pynlong 3 sngi ia ka ‘Train-the-Coach’ ha kaba ki nonghikai kiba la shah jied na ki 15 tylli ki jaka pule na kylleng ka jylla kila ioh ia ki jinghikai pyntbit ialade na ki briew kiba la ih bha ha ka kam bad hadien kane ha ka Design Thinking Challenge, kine ki Coach ne ki nonghikai kila ialam pat ia ki samla pule na ki 15 tylli ki jaka pule ban iakhun ia ki jingeh kiba mad shisha ha ki liang bapher bapher ku ha ka jingbym iohkam iohjam, ka jingpyndonkam ia ki niut ki nier, ka leit ka wan, ban pynnen pynsah iaka kam jngohkai bad karep ka riang.
Ka jingthmu jong ka prokram ka long ban pynkup bor ia ki nongiashimbynta da ki buit ha kaban shna ia ki jingshna kiba thymmai, ban pynleit jingmut halor kaj ingkwah jong ki nongthied, ban kyntiew ia ka ioh ka kot bad ka jingdonbynta lang ha ka imlang sahlang bad ki nongiashimbynta kiba jop kin ioh ia ka lad ban pyniar ia ka jingthmu ka jongki lyngba ka Incubation jong ka Prime Hub.
