Hukum ka KHADC ia ka Hima Sohra ban aiti ia ki dulir/pata ki bar jylla ha Majai
Shillong, Naitung 10 : U Chief Executive Member (CEM) ka Khasi Hills Autonomous District Council (KHADC) Bah Pyniaid Sing Syiem, ula ai jubab ia ka kynhun kiengatiar Hynniewtrep National Liberation Council (HNLC) da kaba ong “Wad shuwa ia ki jingtip hashuwa ban byrngem ban kynnoh Ingkhong shyllangmat ia Nga”.
U CEM ula kynthoh ia kane hapoh ka Iingdorbar Thaw Ain jong ka Council hynne ka sngi haba iashimbynta ha ka jingiatai halor ka jingkajia kaba mih hapoh ka Hima Sohra namar ka jingpynkha ia ka Raid Majai.
Ka Hynniewtrep National Liberation Council (HNLC) ha ka 4 tarik Naitung, kala byrngem ia u CEM ka KHADC ba u dei ban pyndam noh mardor ia ka jingpynbna (Notification) ba pynmih dang shen, ba ai jingithuh ia ka Majai kum ka Raid.
“Ka HNLC ka maham ia u CEM ba u dei ban pyndam noh mardor ia ka jingpynbna ba dang shen ban ithuh ia ka Majai kum ka Raid lem kumta…. Ka Majai ka dei kaba pyniaid da ki hehspah jong ki bar jylla ba ‘Ingkhong shyllangmat” ong u General Secretary –cum-Publicity Secretary ka HNLC Bah Sainkupar Nongtraw haba bynrap ba ka jingpynbna kum ka Raid kala pynkmen shikatdei eh ia ki bar jylla ba sah ha Majai, kiba la lehkmen ia kane ka jingpynbna da kaba thang bom pataka bad iashad ia risa.
Haba jubab ia kane, u CEM ula ong “Nga kwah ban kyntu ba shuwa ban byrngem, sngewbha wad shuwa kin ia ka jingtip bad ynda phi la tip ia ka jingshisha, lada phi byrngem, lada phi ong nga dei u Ingkhong shyllangmat ruh ngam sngew eiei”.
“Ban shu kynnoh Ingkhong shyllangmat ka suk eh hynrei ynda iapeit ia kine ki kam ba ngi leh hangne, phin kylli ma phi ko HNLC, kham ieid Jaidbynriew ma Nga ne Mano” ula bynrap.
U Bah Pyniaid ula ong “Nga kwah ban phah ia ka khubor kaba shai ba ngi shong hangne da ka jingsngewkhia bad ka jingkitkhlieh….namar kata aiti ha ngi ka EC bad ka Council ba ngin leh ia kaei kaba bha tam na ka bynta ki Hima ha kylleng ki jaka”.
Halor ka jingpynsngew ki khun ki hajar ka Hima Sohra ba kim pat sngewbit ban don ka Raid Majai, u CEM ula ong “Ngi la shimkhia ia kane bad ngin sa bishar bniah bha ma ngi ia kaei kaba bha tam bad ngin sa iasyllok lang bad u MDC ka thain hadien ba kut ka Dorbar”
Ha kajuh ka por, u CEM ula kyntu ia ka Liang Iatei (Liang Pyrshah) ba kin ai ai jingmut lem ban pynbeit ia ki kynrum kynram jong ka Hima Sohra bad ka Majai.
“Ka Majai ka dei ka jaka ba ju mih bha ki kynrum kynram ym tang ha ka por jong nga kum u CEM hynrei wat ha ki snem ba mynshuwa ruh, ka dei kaba ju pynmih jingeh bha”.
U CEM ula pyntip ba ka Hima Sohra dang ha kine ki khyndiat sngi, kala aipor ia ka KHADC halor ka jingpynbna ia ka Majai kum ka Raid bad ong “Mynta ka Executive Committee jong ka Council ka hap buh por kylla ba hapoh ka 15 tarik Naitung, ka Executive Dorbar ka Hima Sohra ka dei ban phah lut ia baroh ki dulir/pata khyndew ba ka Hima ka ai sha ki bar jylla ha Majai sha ka Council ba ngin bishar bad leh ia kaba donkam”.
 ka Khasi Hills Autonomous District Council (KHADC) Bah Pyniaid Sing Syiem, ula ai jubab ia ka kynhun kiengatiar Hynniewtrep National Liberation Council (HNLC) da kaba ong “Wad shuwa ia ki jingtip hashuwa ban byrngem ban kynnoh Ingkhong shyllangmat ia Nga”.){kind=link}